Туркиянинг Каппадокия аэропортида полиция ходимлари гўшт майдалагич ва хамир қориш машиналари ичига яширилган 61 килограмм 121 грамм контрабанда олтинни аниқлади. Операция доирасида олти киши, улардан 5 нафари Ўзбекистон фуқаролари қўлга олинди, дея хабар беради Туркия ОАВ.
Невшеҳир полициясининг Контрабанда ва уюшган жиноятчиликка қарши курашиш бошқармаси ходимлари мамлакатга ноқонуний йўл билан катта миқдордаги олтин олиб киришга уриниш ҳақида тезкор маълумот олди. Невшеҳир ва Гюльшеҳир прокуратуралари кўрсатмасига биноан полиция аэропортда техник ва жисмоний кузатув ишларини бошлади.
5 нафар ўзбекистонлик Туркияга Истанбул орқали авиарейс билан етиб келган. Уларнинг юкларини текшириш чоғида полиция ходимлари шубҳа остига тушган гўшт майдалагич ва хамир қориш машиналарига эътибор қаратди. Ускуналарни пармалаш орқали очилгандан сўнг, ичидан эритилиб, механизм деталлари остига яширилган олтин қуймалари топилди.
Мусодара қилинган олтиннинг бозор қиймати тахминан 355 миллион Туркия лираси (тахминан 8,46 миллион АҚШ доллари) деб баҳоланмоқда.
Операция натижасида 3 нафар аёл ва 2 нафар эркак — Ўзбекистон фуқаролари, шунингдек, контрабанда юкини олиш учун аэропортга келган бир нафар Туркия фуқароси қўлга олинди.
Қўлга олинган хорижликлардан бири депортация қилиш учун Ноқонуний миграцияга қарши курашиш бошқармасига топширилди, қолганлари ҳибсга олинди.
Kaçak Altın Operasyonunda 5 Şahıs TUTUKLANDI pic.twitter.com/vWTCaV82gH
— Nevşehir Emniyet Müdürlüğü (@nevsehiremniyet) October 25, 2025
