Ўзбекистон Президенти Шавкат Мирзиёев 2025 йил 27 октябрь куни фуқаро авиацияси соҳасидаги давлат сиёсатини янада такомиллаштириш чора-тадбирлари тўғрисидаги фармонни имзолади.
2030 йилгача фуқаро авиациясини ривожлантиришнинг асосий мақсадли кўрсаткичлари этиб қуйидагилар белгиланди:
- ҳаво транспортида хизмат кўрсатилган йўловчилар сонини 24 миллионга етказиш;
- халқаро ва маҳаллий йўналишлар бўйича парвозлар сонини 200 мингга етказиш;
- Республика авиакомпания-резидентларининг ҳаво кемалари паркини 180 тага етказиш;
- Тошкент халқаро аэропортининг янги биринчи қурилиш босқичини амалга ошириш.
Бундан ташқари, ИКАО (Халқаро фуқаро авиацияси ташкилоти — БМТ муассасаси) талабларининг парвозлар хавфсизлигини таъминлаш бўйича 8 йўналишда ўртача 85% даражасида бажарилишига эришиш режалаштирилган.
«Ўзавиация» агентлигининг вазифалари
«Ўзавиация» фуқаро авиацияси агентлигига ИКАО талаблари ва стандартларини амалиётга татбиқ этиш, ИКАО ҳужжатларининг тузилиши ва мазмунига мувофиқ авиация қоидаларини ишлаб чиқиш, молиявий ва техник базани мустаҳкамлаш, инспекторлар малакасини ошириш, шунингдек, фуқаро авиацияси ходимларини халқаро стандартларга мувофиқ тиббий кўрикдан ўтказишни ташкил этиш топширилди.
Агентликка қўшимча 51 та штат бирлиги ажратилади, бошқарув ходимларининг чекланган сони 109 нафар этиб белгиланади. Бунда ажратилган қўшимча штат бирликлари доирасида хорижий мутахассисларни жалб қилишга (штатнинг умумий сонининг 25% дан кўп бўлмаган ҳолда) рухсат берилади.
ИКАО талабларига мувофиқ, 2026 йил 1 апрелдан бошлаб «Ўзавиация» тузилмасида ходимларни тиббий кўрикдан ўтказишга ихтисослашган Авиация тиббиёти бўлими ташкил этилади. Шу муносабат билан Ислом Каримов номидаги Тошкент халқаро аэропортининг врач-учиш эксперт комиссияси тугатилади.
2026 йил 1 январдан бошлаб «Ўзавиация»ни сақлаш учун давлат бюджетидан ажратмалар бекор қилинади. Шунингдек, 2025 йил якунлари бўйича ва кейинги йиллар учун «Ўзаэронавигация» маркази ДУКнинг соф фойдасидан Фуқаро авиацияси агентлигини ривожлантириш жамғармасига йўналтириладиган 20% миқдоридаги ажратма бекор қилинади.
«Ўзаэронавигация» марказининг вазифалари
Ҳужжат билан «Ўзаэронавигация»га ҳаво ҳудудининг хусусиятлари ва ИКАО стандартларига асосланган PBN (Performance-Based Navigation) навигация тизимини жорий этиш бўйича қўшимча вазифалар юклатилади.
Марказ Ўзбекистон фуқаро авиациясида ҳаво ҳаракатига хизмат кўрсатиш бўйича ваколатли орган ва аеронавигация хизматларини етказиб берувчи сифатида белгиланади.
Янги норматив-ҳуқуқий ҳужжатларни ишлаб чиқиш
Транспорт вазирлигига манфаатдор вазирликлар ва идоралар билан биргаликда белгиланган тартибда Вазирлар Маҳкамасига қуйидаги норматив-ҳуқуқий ҳужжатлар лойиҳаларини киритиш топширилди:
- 2026 йил 1 октябргача — ИКАО талабларини ҳисобга олган ҳолда ва хорижий тажриба асосида ишлаб чиқилган Ўзбекистон Ҳаво кодексининг янги таҳрири лойиҳаси;
- бир ой муддатда — Ўзбекистон фуқаро авиацияси соҳасида давлат сиёсатини юритиш тўғрисидаги маъмурий регламентни тасдиқлаш ҳақидаги ҳукумат қарори лойиҳаси;
- бир ой муддатда — республикада ҳаво ҳаракатини бошқариш тизимини такомиллаштириш чора-тадбирлари тўғрисидаги ҳукумат қарори лойиҳаси;
- икки ой муддатда — учувчилар ва борт кузатувчиларини тайёрлаш бўйича ўқув муассасасини ташкил этиш тўғрисидаги ҳукумат қарори лойиҳаси.
Божхона ва солиқ имтиёзлари
Авиакомпания-резидентларнинг йўловчи ва юк ҳаво кемалари Ўзбекистонга импорт қилишда божхона божи ва қўшилган қиймат солиғи тўлашдан озод қилинадиган технологик ускуналар рўйхатига киритилди.
Авиация инфратузилмасига инвестициялар
Иқтисодиёт ва молия вазирлигига Транспорт вазирлиги билан биргаликда Ўзбекистоннинг 2026–2028 йилларга мўлжалланган ижтимоий ва ишлаб чиқариш инфратузилмасини ривожлантириш дастурларини шакллантиришда уч йил давомида ҳар йили давлат бюджетидан 250 миллиард сўм ажратишни назарда тутиш топширилди:
- аэродромлар ва ҳаво ҳаракатини бошқариш комплексларини модернизация қилишга;
- парвозларни радиотехник таъминлаш ускуналарини сотиб олишга;
- аэропортларнинг аэродром комплексларини қуриш, капитал таъмирлаш ва реконструкция қилишга.
