Veolia Energy Tashkent пойтахтнинг айрим ҳудудларида иссиқ сув ранги ўзгаргани ҳақидаги хабарларга изоҳ берди.
Компания матбуот хизмати хабарида айтилишича, иситиш мавсуми бошланишидан олдин иссиқлик тармоқлари тайёргарлик режимига ўтказилганда ва сув қувурлар бўйлаб аста-секин айлана бошлаганда, сувда жигарранг ёки занг туси пайдо бўлиши мумкин.
«Бу тизимни текшириш ва иситиш узатилишидан олдин тармоқнинг бир текис иситилишини таъминлаш учун зарур бўлиб, бунда сув магистрал қувурлар бўйлаб ҳаракатлана бошлайди», — дейилади компания хабарида.
«Иситиш мавсумидан ташқари даврда (баҳор-ёз-куз), иситиш тизими ишлатилмаганда, пойтахтнинг иссиқлик тармоқлари ёзги режимда ишлайди. Бу даврда иссиқ сув иккита магистрал қувурдан бири орқали етказиб берилади, иккинчи линияда эса иситиш мавсумига тайёргарлик доирасида режали таъмирлаш ишлари олиб борилади. Бундай ишлар давомида қувурларнинг айрим қисмлари вақтинча сувдан бўшатилади, таъмирлаш тугагандан сўнг эса тизим зичлигини текшириш учун тармоқ суви билан тўлдирилади», — дея тушунтирди Veolia Energy Tashkent.
«Тўхтаб турганда, айниқса юқори ҳароратда ва суюқлик ҳаракати чекланганда, сувнинг металл қувурларнинг ички деворлари билан табиий ўзаро таъсири юзага келади. Уларнинг юзасида юпқа занг қатлами ҳосил бўлади, у кейинги айланиш бошланганда қисман ювилиб, сувга жигарранг тус беради. Бундай ҳодиса вақтинчалик бўлиб, тизим параметрлари барқарорлашгандан сўнг бир неча кундан кейин йўқолади», — дея қайд этди компания.
Текширувлар давомида Veolia Energy Tashkent айрим уйларда иссиқ сув ёзда айланишда иштирок этмайдиган қайтарма қувур орқали етказиб берилганини ҳам аниқлади. Бундай уланиш иссиқ сув ҳароратининг пасайишига, сувнинг димланиб қолишига ва унинг ранги ўзгаришига олиб келади. Компания ходимлари бошқарув ташкилотлари вакиллари билан биргаликда иссиқлик узеллари схемаларини тузатиш ва сув тозалангунга қадар уни технологик тарзда тушириб юбориш ишларини олиб бормоқдалар.
Сув ранги ўзгаришига дуч келган фуқаролардан компаниянинг колл-марказига (1347 ёки 71 200 00 56 иш кунларида) ёки дам олиш кунларида унинг туман бошқармаларига мурожаат қилиш сўралди. Ташқи тармоқларнинг сув сифатига таъсири тасдиқланган тақдирда, тўловларни қайта ҳисоблаш масаласи кўриб чиқилади (далолатномалар асосида).
Иссиқлик таъминотининг ёпиқ тизимига ўтиш якунлангандан сўнг сув ранги ўзгариши муаммоси ўтмишда қолиши керак. Компания томонидан амалга оширилаётган лойиҳа доирасида эски металл қувурлар замонавийларига алмаштирилмоқда, турар жой биноларида эса якка тартибдаги иссиқлик пунктлари (ЯТИП) ўрнатилади.
Ёпиқ тизимда иссиқ сув тармоқдан тўғридан-тўғри келмасдан, балки ЯТИП орқали бино ичида иситилади. Бунинг натижасида тармоқ сувининг жўмракларга тушиши истисно этилади, айланиш йил давомида сақланиб қолади, сувда занг пайдо бўлиши хавфи бартараф этилади.
