Тошкент метрополитени «Ўзбекистон мустақиллигининг 30 йиллиги» ер усти ҳалқа йўналишидаги «профилактика ишлари» тез орада якунланиши ҳақида хабар берди.
14 та станциядан иборат бўлган мазкур линия 2025 йил 2 августдан бутунлай ёпилган эди. Унинг қисман ёпилиши эса 8 июндан бошланган.
Хабарда айтилишича, линия қайта ишга туширилгандан сўнг метро поездлари йўловчиларсиз, тест режимида ҳаракатланади.
Йўллар олиб ташлангани ва керакли ишлардан сўнг қайта ўрнатилаётгани ҳақида хабар тарқалган эди. Метрополитен бунга аниқ нима сабаб бўлганини очиқламаган. Прокуратура эса «бир қатор камчиликлар ва хатолар» аниқланганини маълум қилган.
Ҳалқа йўлининг қурилиши 2017 йилда бошланган. У қисман собиқ трамвай линияси йўналишини такрорлайди. Дастлаб шаҳар электр поездини ишга тушириш режалаштирилган эди. 7 та станциядан иборат биринчи босқич (1–7-станциялар) 2020 йил сентябрда очилган. Яна 5 та станция (8–12-станциялар) 2023 йил апрелда ишга туширилган. Барча станциялар номсиз — фақат рақамли белгилар билан очилган эди. Фақатгина 2023 йил август ойида ҳукумат уларнинг номларини тасдиқлади. Линиянинг якуний иккита станцияси — «Қипчоқ» ва «Турон» — 2024 йил март ойида очилган.
