Футбол бўйича Ўзбекистон терма жамоаси Халқаро футбол федерациясининг (ФИФА) 2025 йил сентябрь рейтингида бир поғона юқорилади ва 54-ўринни эгаллади. Ҳозирда миллий жамоа 1453,31 баллга эга (+4,19).
2025 йил август-сентябрь ойларида миллий жамоа Марказий Осиё футбол ассоциацияси (CAFA Nations Cup 2025) Миллатлар кубоги доирасида тўртта ўйин ўтказиб, финалда Эрон устидан ғалаба қозонди.
Бироқ, футбол эксперти Алишер Никимбаев тушунтиришича, турнир ўртоқлик ўйини мақомида бўлганлиги сабабли, ўйинлар пасайтирилган коэффициентлар билан ҳисобга олинган: дастлабки ўйинлар — 5, кейингилари — 10, финал ва учинчи ўрин учун ўйин эса ҳисобга киритилмаган, чунки ФИФА кунларида фақат иккита ўйин инобатга олинади.
Турнирни 1449,12 кўрсаткич билан бошлаган Ўзбекистон Уммон билан дуранг ўйнади (-0,63 балл), сўнгра Туркманистон (+2,03) ва Қирғизистонни (+2,83) мағлуб этди. Эрон билан учрашув рейтингга таъсир қилмайди.
Унинг сўзларига кўра, бу рейтинг 2025 йил 5 декабрдаги жаҳон чемпионати қуръа ташлаш маросимида саралаш учун асос бўлади.
Осиё терма жамоалари орасида Ўзбекистон олтинчи ўринда жойлашган. Ундан олдинда Япония (19-ўрин, июлдан бери икки поғона йўқотди), Эрон (21-ўрин, -1), Жанубий Корея (23-ўрин, ўзгаришсиз), Австралия (25-ўрин, -1) ва Қатар (53-ўрин, ўзгаришсиз) бор. Ўзбекистондан кейин Ироқ (58-ўрин, ўзгаришсиз) ва Саудия Арабистони (59-ўрин, ўзгаришсиз) келмоқда.
Жаҳон рейтингида Испания (+1), Франция (+1) ва Аргентина (-2) терма жамоалари етакчилик қилмоқда. Шунингдек, кучли ўнликка Англия, Португалия (+1), Бразилия (-1), Нидерландия, Бельгия, Хорватия (+1) ва Италия (+1) кирди.
Ўзбекистон терма жамоасининг ФИФА рейтингидаги энг юқори натижаси 45-ўрин бўлиб, мамлакат бу ўринни 2006 йил 22 ноябрдан 2007 йил 14 февралгача эгаллаган. Энг паст натижа эса 1996 йил ноябрда қайд этилган — 119-ўрин.
