Навоий вилоятининг «Тошкент-Хатирчи» автобус йўналишида йўловчи ташиш хизматларини кўрсатувчи компания чипта сотишда ортиқча ундириб олинган 710 млн сўмни йўловчиларга қайтаришга мажбурланди. Бу ҳақда Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Идоранинг аниқлик киритишича, текширув ҳуқуқни муҳофаза қилиш органларидан келиб тушган ҳужжатлар асосида ўтказилган. Уларда фуқаро Ў. Ч.дан ташувчи томонидан йўл ҳақи учун оширилган тўлов олингани ҳолати қайд этилган.
Қўмита 2022 йил 22 августдан 2025 йил 31 мартгача бўлган даврда компаниянинг йўналишдаги ишини ўрганиб чиқишга қарор қилди ва қоидабузарликларни аниқлади: қўшимча хизматларни мажбурий тақдим этиш ва кўрсатилмаган хизматлар учун тўлов ундириш. Ушбу даврда 74,4 мингта чипта учун йўловчилар қарийб 710 млн сўм ортиқча тўлагани аниқланди.
Махсус комиссия иш қўзғатди ва «Ҳунарманд» компаниясига йўловчиларга маблағларни қайтариш бўйича кўрсатма берди.
2024 йил ва 2025 йилнинг 7 ойи давомида қўмита ва унинг ҳудудий бўлинмаларига транспорт соҳасида фуқаролардан 1050 га яқин мурожаат келиб тушган. Улар фойдасига 1,4 млрд сўмга яқин маблағ қайта ҳисоблаб чиқилган.