Сурхондарё вилоятининг Сариосиё тумани ҳокимининг оила ва хотин-қизлар масалалари бўйича ўринбосари Дилфуза Тошматова маҳалла фаолларидан одамларнинг пахта теримида иштирокини таъминлашни талаб қилди. Бу ҳақда Kun.uz нашри хабар берди, унинг ихтиёрига буни тасдиқловчи видео ва аудио материаллар келиб тушган.
Тошматова ҳар бир фаол далага 5-10 кишини олиб чиқиши керак бўлган ҳудудларни санаб ўтди. Унинг сўзларига кўра, жами 150 киши фермерлар «йиғлаб, бошқа келмасликни сўраши» учун майдонни «топ-тоза қилиб териб кетиши» керак эди. Аёл фаолларга мурожаат қилар экан, у шундай деди:
«Бунинг учун одамлар керак. Агар ҳамма эртароқ келиб, меъёрни бажарса, ҳаммамиз эртароқ кетамиз. Нега ҳалигача ҳеч ким йўқ? Аёлмисан-йўқми, ноинсоф?! Виждонсиз! Агар келадиган бўлсанглар — тезроқ бу ёққа келинглар, ишлашни хоҳламасанг — йўқол, кет».
«Келаётганлар ҳамманг тезроқ, менга хабар беринглар. Менга рўйхат тузиш керак. Тушгача неча киши, неча килограмм терар эканмиз — ҳозир ҳисобот кетяпти», — дея талаб қилди Тошматова.
Бундан ташқари, ҳоким ўринбосари кетишга ва ариза ёзишга қарор қилганлар бу ишни «ақллилик қилмасдан» амалга ошириши мумкинлигини, қолганлар эса ишни бажаришга мажбур эканлигини таъкидлади.
Бандлик ва камбағалликни қисқартириш вазирлиги Дилфуза Тошматова Маъмурий жавобгарлик тўғрисидаги кодекснинг 51-моддаси 1-қисми (меҳнатга маъмурий мажбурлаш) асосида 50 базавий ҳисоблаш миқдори (20,6 млн сўм) миқдорида жаримага тортилганини маълум қилди.
Сурхондарё вилояти ҳокимлигининг баёнотида айтилишича, вилоятда пахта терими мавсуми олдидан уй-уй юриш асосида ихтиёрий теримчилар рўйхати тузилган. Маҳаллалардаги фаол аёллар отряд раҳбарлари этиб тайинланган.
«Сурхондарё вилояти ҳокимлиги мажбурий меҳнатнинг ҳар қандай кўринишини кескин қоралайди. Бирорта ҳам масъул шахсга ходимларни пахта теримига мажбуран жалб қилиш бўйича топшириқ берилмаган», — дейилади хабарда.
Дилфуза Тошматова 2022 йилдан буён Сариосиё тумани ҳокими ўринбосари — оила ва хотин-қизлар бўлими бошлиғи лавозимида ишлаб келмоқда.
Аввалроқ Бандлик ва камбағалликни қисқартириш вазирлиги мажбурий меҳнат ҳолатларига дуч келинганда Бандликка кўмаклашиш бўлимларига ёки 1282 қисқа рақамига, шунингдек, Давлат меҳнат инспекцияси билан боғланиш учун @munosibmehnat_bot Telegram-боти орқали мурожаат қилиш мумкинлигини маълум қилган эди.