Андижон вилояти Бўстон тумани ҳокимининг икки ўринбосари — инвестициялар, шунингдек, қишлоқ ва сув хўжалиги масалалари бўйича ўринбосари коррупцияда гумонланиб ҳибсга олинди, дея хабар берди Ўзбекистон Давлат хавфсизлик хизмати. Операция бошқа ҳуқуқ-тартибот идоралари билан ҳамкорликда ўтказилган.
ДХХ маълумотларига кўра, амалдорлар тил бириктириб ва ўз хизмат ваколатларини суиистеъмол қилиб, туманда фаолият юритувчи фермер хўжалигининг 500 минг долларлик экспорт режасини сохта экспорт операциялари орқали «ёпиб бериш» учун 65 млн сўм талаб қилган.
Қишлоқ ва сув хўжалиги бўйича ҳоким ўринбосари 2025 йил август ойида 25 млн сўмни аванс сифатида олган. Қолган 40 млн сўмни инвестициялар бўйича ҳоким ўринбосари орқали олаётганида ашёвий далиллар билан қўлга олинган.
Икки нафар мансабдор шахсга нисбатан Жиноят кодексининг 210-моддаси 2-қисми «в» ва «г» бандлари (бир гуруҳ мансабдор шахслар томонидан олдиндан тил бириктириб, товламачилик йўли билан пора олиш) бўйича жиноят иши қўзғатилган. Улар ҳибсга олинган.
Кўрсатилган бандлар бўйича жазо 5 йилдан 10 йилгача озодликдан маҳрум қилишни назарда тутади.
Андижон вилоятида коррупция ҳолатлари
2024 йил ёзда Бўстон тумани ҳокимининг қишлоқ ва сув хўжалиги бўйича ўринбосари ҳам пора олаётганда қўлга олинган эди.
2025 йил август ойи охирида Жалақудуқ тумани ҳокими ўринбосари ва Андижон вилояти Экология бошқармаси раҳбарларидан бири пора олишда гумонланиб ҳибсга олингани хабар қилинган эди. Хабарда улар фермердан дала ҳовли талаб қилгани айтилади.
2025 йил июль ойида худди шу вилоятда бир неча амалдор, жумладан, Андижон шаҳар статистика бўлими бошлиғи (Андижон тумани ҳокимининг собиқ ўринбосари), шунингдек, Хонабод ҳокимининг ўринбосари қўлга олингани ҳақида хабар берилган эди.
2024 йилнинг март ойида Асака туманида қишлоқ хўжалиги бўйича ҳоким ўринбосари, прокурор ўринбосари, туман кадастр бошқармаси бошлиғи, РИИБ тергов бўлими собиқ ходими ва бошқалар жиноят ишларига жалб қилингани ҳақида хабар берилган эди.