Президент Шавкат Мирзиёев 2025 йил 5 сентябрь куни раҳбарларнинг ислоҳотларни ўз вақтида ва сифатли амалга оширишдаги ташаббускорлиги, масъулияти ва ваколатларини янада ошириш зарурлигини таъкидлади.
Ўзбекистон адлия вазири Акбар Тошқулов «Ўзбекистон 24» телеканалига берган интервьюсида бугунги кунда норматив ҳужжатларнинг катта қисми Вазирлар Маҳкамасида қабул қилинаётгани, вазирлик ва идораларнинг уларни ишлаб чиқиш ва ижро этишдаги роли пастлигича қолаётганини таъкидлади.
«Шунга мос равишда, уларнинг масъулияти ҳам паст», — деди Тошқулов.
Президент фармонига кўра, ўз соҳаларида давлат сиёсатини амалга оширувчи вазирлик ва идораларга идоравий норматив-ҳуқуқий ҳужжатларни қабул қилиш ҳуқуқи берилади.
«Вазирлик ва идораларнинг ўзларига бириктирилган соҳада давлат сиёсатини амалга ошириш учун масъулияти оширилмоқда. Уларга ҳукумат ёки президентнинг кўрсатмасини кутмасдан, ўз ваколатлари доирасида мустақил равишда қарор қабул қилиш ҳуқуқи берилади. Бу ҳукумат иши ҳажмини тахминан 30 фоизга қисқартиради», — деди вазир.
Тошқуловнинг сўзларига кўра, ваколатлар тақсимланадиган аниқ йўналишлар аллақачон белгилаб олинган. «Биз қайси масалалар бўйича қарорни вазирликнинг ўзи қабул қилишини, қайсиларини — ҳукумат ва қайси ҳолларда қонун билан мустаҳкамланиши кераклигини белгиладик. Буларнинг барчаси тегишли соҳаларда сиёсатни ривожлантиришга ёрдам беради», — дея сўзини якунлади Адлия вазирлиги раҳбари.
Бундай ҳужжатларни қабул қилиш ва давлат рўйхатидан ўтказиш тартиб-таомилларини соддалаштириш, муддатларни икки баробар қисқартириш режалаштирилган.
2025 йил июль ойи ўрталарида президент матбуот хизмати вазирлик ва идораларга қарор қабул қилишда кўпроқ мустақиллик берилиши ҳақида хабар берганди. Давлат органлари ўз ваколатлари доирасида, ортиқча бюрократиясиз, соҳаларни тартибга солувчи норматив ҳужжатларни қабул қилиши мумкин бўлади. Ўшанда Адлия вазирлиги ҳужжатларни таҳрирлаш ва халқаро стандартларга мос нормаларни киритишга рухсат бериши қайд этилганди.