Тошкент вилоятининг Ангрен шаҳридан ўтган «Тошкент — Ўш» трассаси қисмида бир нечта автомобиль иштирокида йирик йўл-транспорт ҳодисаси содир бўлди.
Ижтимоий тармоқларда тарқалган видеоларга кўра, ЙТҲда нефть ташиш учун мўлжалланган махсус транспорт, цемент ташувчи юк машинаси ва бир нечта енгил автомобиль иштирок этган, деб ёзади Kun.uz. Кадрларда ёнаётган автомобилларни, жумладан, бутунлай олов ичида қолган бензовозни кўриш мумкин.
Бошқа бир видеода жабрланувчилардан бири ёнаётган юк машинаси кабинасидан чиқишга муваффақ бўлгани кўринади. Кейинчалик бу автомобиль бутунлай ёниб кетган.
Бошқа бир ёзувда гувоҳлар қурбонлар борлигини айтган, аммо ўша пайтда қурбонларнинг аниқ сони айтилмаган.
Кейинроқ Тошкент вилояти Ички ишлар бош бошқармаси ЙТҲ юзасидан чекланган маълумот берди. Идора авария 2025 йил 7 сентябрь куни соат 12:20 да бир нечта автомобиль иштирокида содир бўлганини маълум қилди, бироқ уларнинг сони ва моделлари айтилмаган. Гарчи ЙТҲ акс этган биринчи видеолар соат 12:21 да пайдо бўлган бўлса-да.
ИИББ қурбонлар ва жабрланувчилар сонини ошкор қилмади, бироқ Жиноят кодексининг 266-моддаси 3-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилганини маълум қилди. Унда модданинг учта бандидан қайси бири назарда тутилгани кўрсатилмаган (содир этилган ҳаракат: а) одам ўлимига сабаб бўлса; б) ҳалокатга сабаб бўлса; в) бошқа оғир оқибатларга сабаб бўлса).
Шунга қарамай, ЖКнинг 266-моддаси 3-қисмида камида 2 кишининг ўлими мавжудлиги кўрсатилган.
Авария трассанинг мазкур қисмида ҳаракатнинг тўлиқ тўхтаб қолишига олиб келди. «Тошкент — Оҳангарон — Ангрен — Қўқон — Шаҳрихон — Андижон» автомобиль йўлининг 93−94-километрларида иккала йўналишда ҳам — «Тошкент — Фарғона водийси» ва аксинча — катта тирбандлик юзага келди.
«Қамчиқавтойўл ИЙФК» Telegram-канали соат 13:50 да ҳаракат вақтинча тўхтатилгани, тегишли хизматлар ҳодиса оқибатларини бартараф этиш билан шуғулланаётгани ҳақида хабар берди. Кейинроқ хабар тирбандликлар борлиги ҳақидаги маълумот билан таҳрирланди. Шарҳларда фойдаланувчилар соат 18:02 да ҳаракат қисман тикланганини маълум қилди.
Эслатиб ўтамиз, 2021 йил май ойида ҳам Ангренда йирик авария содир бўлган, унда 7 киши ҳалок бўлиб, 14 киши жабрланган эди.