Ўзбекистонда 2026 йил 1 январдан бошлаб ҳарфли ва рақамли комбинацияларга эга ноёб давлат рақамларини сотиб олиш имконияти пайдо бўлади. Бу ҳақда ЎзА Вазирлар Маҳкамасининг 2025 йил 4 сентябрдаги қарорига таяниб хабар берди.
Ҳужжатга кўра, «Uzavtomotobelgi» давлат унитар корхонасига очиқ электрон аукционлар орқали бундай рақамларни бериш ҳуқуқи берилди.
Ноёб рақамлар олтитагача ҳарф ва (ёки) рақамлар комбинациясидан иборат бўлиши мумкин. Шу билан бирга, улар амалдаги давлат рақамларини такрорламаслиги, қонунчилик ёки маънавий нормаларга зид бўлган маъноларни ўз ичига олмаслиги керак.
«Бу шуни англатадики, кўчаларда, масалан, „SARVAR“, „AZIZA“, „ODIL“ ёки „BUXORO“ каби рақамли автомобилларни кўриш мумкин бўлади», — дея қайд этади ЎзА.
2019 йилда Mening Fikrim жамоавий мурожаатлар порталида Ўзбекистонда шахсий рақам белгиларини жорий этиш масаласи кўтарилган эди. Петиция муаллифи бундай амалиёт кўплаб мамлакатларда мавжудлиги ва давлат бюджетига қўшимча даромад манбаи бўлиши мумкинлигини таъкидлаган эди.
Бугунги кунда avtoraqam.uzex.uz сайтидаги аукционда фақат давлат рақамларининг стандарт форматига мос келадиган «чиройли» рақамлар сотилмоқда. Петиция 900 дан ортиқ овоз тўплади. Қоидаларга кўра, 10 мингта имзога эришганда таклиф кўриб чиқиш учун Олий Мажлис Қонунчилик палатасига юборилади.
Қирғизистонда исмли авторақамларга 2012 йилда рухсат берилган.