2025 йил 4 сентябрь куни тушдан кейин Бухорода беш нафар ишчи 8 метр чуқурликдаги канализация қудуғига тушиб кетди ва уларни сув оқизиб кетди. Бу ҳақда Бухоро вилояти Ички ишлар бошқармаси хабар берди.
«Файз бинокор Олтиариқ» корхонаси ишчилари 7-кичик даҳадаги янги уйлардан тортилган қувурларни марказий канализацияга улаш билан шуғулланган. Ишлар сув таъминоти ва канализация корхонаси билан келишилмаган.
«Ўрта Осиё қурилиш» корхонаси крани ёрдамида кенглиги 1 метр бўлган қудуқ қопқоғи очилган ва меҳнатни муҳофаза қилиш қоидаларини бузган ишчилар ичкарига тушиб кетган, дейилади хабарда.
3 нафар ишчининг жасади Бухоро туманининг «Зарманоқ» маҳалласи ҳудудидаги канализация тақсимлаш пунктидаги қувур ичидан топилди. Қолган 2 кишининг жасади қидирилмоқда.
Мазкур ҳолат юзасидан Ўзбекистон Жиноят кодексининг 257-моддаси 2-қисми «а» банди (меҳнатни муҳофаза қилиш қоидаларини бузиш) билан жиноят иши қўзғатилди.