Тошкентда Telegram мессенжерида АPK кенгайтмали дастурлар кўринишидаги вирус тарқатиш йўли билан фуқароларнинг банк карталаридан пул ўғирлашда гумон қилинган 5 киши қўлга олинди. Бу ҳақда ИИВ Киберхавфсизлик маркази хабар берди.
Шахсий маълумотларни ўғирлаш билан шуғулланган жиноий гуруҳнинг тахминий аъзолари мамлакат миқёсида ўтказилган «Хавфсиз кибермакон» тезкор-профилактик тадбирлари давомида фош этилди. Тахминларга кўра, гуруҳда 11 давлат вакиллари фаолият юритмоқда.
Маълум бўлишича, улар Android тизимидаги қурилмалар учун ишлаб чиқилган вирусни Telegram’даги гуруҳлар орқали тарқатган. Натижада улар SMS хабарлар, шунингдек, контактлар ва қўнғироқлар рўйхатига кириш имкониятини қўлга киритган.
5 нафар қўлга олинган шахснинг манзилларида ўтказилган тинтув давомида улар 133 нафар ўзбекистонликнинг банк карталаридан тахминан 3 миллиард сўм маблағни ўзлаштиргани аниқланди.
Қўлга олинганларга нисбатан жиноий иш қўзғатилган. Ҳуқуқ-тартибот органлари гуруҳга алоқадор бўлиши мумкин бўлган бошқа шахсларни аниқлаш чораларини давом эттирмоқда.
