Ўзбекистон ИИВ Йўл Ҳаракати Хавфсизлиги Хизмати (ЙҲХХ) ўқув йилининг биринчи кунида мамлакат аҳолисини шахсий автомобиллар ўрнига жамоат транспортидан фойдаланишга чақирди.
2025 йил 2 сентябрь куни мактабларда биринчи қўнғироқ чалинади ва одатда бу куни эрталаб кўчаларда тирбандликлар юзага келади.
«ЙҲХХ фуқароларни бугунги кунда ҳар томонлама қулай ва шинам бўлган жамоат транспортидан фойдаланишга чақиради», — дейилади хизмат хабарида.
Олий ўқув юртлари ва лицейларнинг биринчи курс талабалари учун ўқиш 3 сентябрдан, бошқа курслар талабалари учун эса 8 сентябрдан бошланади.
ЙҲХХнинг мактабга боришга тайёрланаётган оила ҳақидаги ролигида аёл машинада боришни таклиф қилади, эркак эса унга: «Сенга ўхшаб ўйлайдиганлар туфайли кўчаларда тирбандлик бўлади», — деб жавоб беради. Она кечирим сўраб, бу ҳақда ўйламаганлигини айтади.