Коррупцияга қарши курашиш агентлиги Uzbekistan Airports компанияси томонидан давлат харидини ўтказишда қонунбузарликларни аниқлади. Аэропортлар оператори 6,8 млрд сўмлик бодикамераларни етказиб бериш ва ишга тушириш бўйича хизматларни сотиб олган.
Агентлик маълумотларига кўра, харид жараёнида иштирокчилар таклифлари тўлиқ ва холисона баҳоланмаган. Бундан ташқари, танловда аффилланган шахслар (яъни, ўзаро боғлиқ ва манфаатдор томонлар) иштирок этган ва баҳолаш жараёнида қатор хатоликларга йўл қўйилган.
«Агентликнинг тақдимномаси асосида харид комиссиясининг ғолибни аниқлаш тўғрисидаги баённомалари бекор қилинди. Ўрганиш ва таҳлил давомида тўпланган ҳужжатлар қонуний чора кўриш учун ҳуқуқни муҳофаза қилиш органларига юборилди», дейилади идора хабарида.
Uzbekistan Airports компанияси харид «қонунчилик ва давлат харидларининг белгиланган тартиб-таомилларига қатъий мувофиқ равишда» амалга оширилганини таъкидлади. Танлов энг паст нарх усулида ўтказилган ва энг паст нархни таклиф қилган компания автоматик равишда ғолиб деб топилган.
«Шартноманинг якуний суммаси 4,3 млрд сўмни (ҚҚС билан) ташкил этди. Агентлик эълон қилган 6,8 млрд сўмлик нарх, йиғилган тижорий таклифлар бўйича ўртача қиймат сифатида белгиланган бошланғич нарх эди. Таклифлар uzairports.com расмий веб-сайти орқали йиғилган», дея аниқлик киритди компания.
Аэропорт оператори шунингдек, танлов ва баҳолаш вақтида иштирокчилар ўртасида тўғридан-тўғри аффилланганлик аниқланмаганини қайд этди. Компания ОАВда тилга олинган учинчи компания тендерда иштирок этмагани, балки фақатгина захира ғолиби билан умумий рўйхатдан ўтиш манзилига эга бўлганини таъкидлади. «Алоҳида компанияларнинг ўзаро боғлиқлиги факти жараён якунлангандан ва натижалар тасдиқлангандан сўнг аниқланди», дея қайд этишди компанияда.
Шу муносабат билан, Коррупцияга қарши курашиш агентлигининг тақдимномаси ва Uzbekistan Airports’нинг қарорига кўра, харид натижалари ҳақиқий эмас деб топилди ва ўтказилган тендер натижалари бекор қилинди, дея хулоса қилди компания.
