2025 йил 26 август куни UzAuto Motors компанияси Chevrolet Tahoe йўлтанламасининг янги версиясини тақдим этди.
High Country комплектациясидаги модель 6,2 литр ҳажмли 8 цилиндрли двигатель ва 420 от кучига эга. 24 дюймли ғилдиракларга эга автомобиль 8 сонияда 100 км/соат тезликка эриша олади.
Компаниянинг расмий хабарига кўра, Tahoe’нинг салони 7 ўринли, уч қаторли, чарм қопламали ўриндиқларга эга. Ҳайдовчи ўриндиғи 8 томонлама электрон тарзда созланади ва фавқулодда вазиятлар учун тебраниш-акс алоқа тизими билан жиҳозланган.
Янги Tahoe нархи 1 464 500 000 сўмни ташкил этади. Сотувлар 2025 йил 11 сентябрдан бошланади.
UzAuto Motors бош директори Янош Ковач яқин орада бошқа моделларнинг ҳам янгиланган версиялари тақдимоти кутилаётганини маълум қилди.
Tahoe биринчи бўлиб тақдим этилди, чунки у Chevrolet брендининг асосий, энг яхши моделларидан бири. Келажакда Captiva моделининг гибрид версияси ҳам кутилмоқда.
Компания раҳбарининг айтишича, Ўзбекистонда ҳар йили 250-300 дона Tahoe сотиш режалаштирилган.
Автомобильнинг юқори нархига изоҳ берар экан, Янош Ковач унинг нархига етказиб бериш харажатлари, техник ишловлар, йиғимлар ва солиқлар киритилганлигини айтди.