Ўзбекистон Президенти Шавкат Мирзиёев 2025 йил 20 август куни тадбиркорлар билан мулоқот чоғида аниқланган хатолар учун солиқ амнистиясини эълон қилди.
Текширувлар натижасида 20 минг тадбиркорда 16 трлн сўм ($1,28 млрд) миқдорида хато ва камчиликлар аниқланган, бу эса уларнинг тадбиркорлар барқарорлик рейтингидаги ўрнига таъсир қилган.
«Шу боис, бугун биз ўзига хос «амнистия» эълон қиламиз: ушбу текширувлар бўйича жарималар қўлланилмайди. Бунинг ўрнига, 1 ноябргача бизнесга барча хато ва камчиликларни ихтиёрий равишда бартараф этиш имконияти берилади. Бир сўз билан айтганда, 1 ноябрдан тадбиркорлар рейтинги «тоза варақдан» бошланади», — деди президент.
Яна бир ўзгариш — фойда солиғи бўйича аванс тўловлари учун чегаранинг оширилиши бўлди. Агар илгари бу 10 млрд сўмдан ортиқ айланмаси бўлган компанияларга тааллуқли бўлган бўлса, энди қоида фақат даромади 20 млрд сўмдан ортиқ бўлган корхоналар учун амал қилади.
Бунинг ёрдамида қарийб 14 минг тадбиркор қўшимча равишда 1 трлн сўмга яқин айланма маблағларни ўз ихтиёрида қолдириши мумкин бўлади, дея таъкидлади Мирзиёев.
ҚҚС ставкаси 12% гача пасайтирилди, ушбу режимдаги тадбиркорлар сони ўсиб бормоқда. Шу билан бирга, кўплаб тадбиркорлар бухгалтерия учун қўшимча харажатлардан хавотирда. Айланма солиғидан ҚҚСга ўтишни рағбатлантириш учун ҳукумат бир қатор имтиёзларни жорий этмоқда: компаниялар бир йил давомида фойда солиғидан озод қилинади, ҳисоботлардаги хатолар учун жазоланмайди, шунингдек, бухгалтернинг маошининг бир қисми (бир ойда 5 млн сўмгача, олти ой давомида) солиқлардан чегириб ташланиши мумкин.
Янги чора-тадбирлар давлат раҳбари томонидан имзоланган тегишли фармонда ўз аксини топган.
