Фарғона вилоятининг Бувайда туманида 2025 йил 16 август куни кундузи содир бўлган ЙТҲ оқибатида олти ёшли бола вафот этди.
Вилоят ИИБ Йўл ҳаракати хавфсизлиги бошқармаси хабар беришича, бола велосипедда йўлга чиқиб кетган ва уни ГАЗ-3110 русумли автомобиль уриб юборган.
Ижтимоий тармоқларда тарқалган видеода ҳайдовчи чапга бурилиб, уриб юборишнинг олдини олишга уринганини, аммо бунинг иложи бўлмаганини кўриш мумкин. Машина металл ортилган тиркамада бўлган, бу эса тормозланиш масофасини узайтирган бўлиши мумкин. У болани бир неча ўн метр масофага судраб кетган.
Атрофдагилар жиддий жароҳат олган болани зудлик билан бошқа машинага солиб, шифохонага олиб боришган. Кўрсатилган тиббий ёрдамга қарамасдан, у вафот этди.
