Instagram’да оилавий зўравонлик ҳақида пост тарқалди. Ўзбекистондаги зўравонликка қарши Nemolchi.uz лойиҳаси масъул шахсларни чора кўришга чақирди.
25 ёшли аёлнинг турмуш ўртоғи томонидан калтаклангани ҳақидаги постни жабрланувчининг опаси жойлаштирган. Ижтимоий тармоқлардаги маълумотларга кўра, косметолог бўлиб ишлайдиган Ж. Э. узоқ вақт давомида эрини таъминлаб келган, ундан калтаклар ва ҳақоратларга чидаб келган. 16 август куни эри уни яна шафқатсизларча калтаклаган.
«Эримнинг ухлашини кутдим ва эрталаб соат 6:00 да кичик ўғлим билан қочишга муваффақ бўлдим», — деди аёл.
Постда жойлаштирилган кузатув камераси видеосида жабрланувчининг қўлида фақат фарзанди билан уйдан тезликда узоқлашаётгани кўринган. Постга аёлнинг юзи ва бошида катта гематомалар ва шишлар мавжуд бўлган суратлари ҳам илова қилинган.
Узоқ вақтдан бери давом этиб келаётган можаролардан қариндошлар ва қўшнилар хабардор бўлган бўлиши мумкин, бироқ ҳеч ким ҳеч қандай чора кўрмаган. Фаоллар ИИВдан ушбу ҳолатга эътибор қаратишни сўрашди.
Сурхондарё вилояти Ички ишлар бошқармаси вазият ўрганилганини маълум қилди.
Ҳуқуқ-тартибот идоралари маълумотларига кўра, 2025 йил 15 августдан 16 августга ўтар кечаси соат 2:30 атрофида Термизнинг «Меҳробод» маҳалласида фуқаро Т. Э. ва унинг турмуш ўртоғи Ж. Э. ўртасида оилавий келишмовчилик келиб чиққан, шу вақтда Т. Э. хотинига тан жароҳатлари етказиб, унинг юзи ва қулоғига урган.
Мазкур ҳолат юзасидан Термиз шаҳар ИИБ профилактика хизмати томонидан терговга қадар текширув ўтказилмоқда.
«Қонуний чоралар қабул қилиниши таъминланади. Ижтимоий тармоқлардаги маълумотларга кўра, аёл турмуш ўртоғининг доимий босими ва зўравонлиги остида бўлгани, бироқ аввал ички ишлар идораларига мурожаат қилмаганини инобатга олиб, бу ҳолатлар алоҳида ўрганилмоқда», — дейилади ИИБ хабарида.
Олий суд маълумотларига кўра, биринчи ярим йилликда маиший зўравонлик учун 4952 киши жазоланган, шундан 3200 нафарига жарима солинган, 1752 нафари ҳибсга олинган, 231 киши эса айни шу жиноятни такроран ёки оғирлаштирувчи ҳолатларда содир этгани учун жазога тортилган. Улардан 65 нафари озодликдан маҳрум қилиш жазосига, 166 нафари эса бошқа турдаги жазоларга ҳукм қилинган.
