Тарихида илк бор жаҳон чемпионатига йўлланма олган футбол бўйича Ўзбекистон миллий жамоаси энди 7Saber либосларида тўп суради. Бу ҳақда Ўзбекистон футбол ассоциацияси хабар берди.
2019 йилдан бери жамоа либосларини Германиянинг Jako компанияси етказиб бераётган эди.
7Saber спорт кийимлари қатори 2021 йилда Токиода ва 2024 йилда Парижда бўлиб ўтган ёзги Олимпия ўйинларида иштирок этган спортчиларга ҳам тақдим этилган эди.
Spot 7Saber`га таяниб хабар беришича, бренд тарихи 2019 йилда Триатлон федерациясининг собиқ раҳбари Отабек Умаров турли спорт турларини ифодаловчи машҳур белгилар асосида график элемент яратган пайтдан бошланади. Умаров ҳозирда Миллий олимпия қўмитаси раисининг биринчи ўринбосари ҳисобланади.
Ўзбекистон миллий жамоаси ўз тарихида илк бор 2026 йилда АҚШ, Канада ва Мексикада бўлиб ўтадиган жаҳон чемпионатининг финал босқичига йўл олди.