2025 йил 11 августга ўтар кечаси «Уч қаҳрамон» бозорида ёнғин содир бўлди, дея хабар берди Фавқулодда вазиятлар вазирлиги матбуот хизмати.
Ёнғин ҳақида хабар Тошкент вилояти ФВБга соат 02:22 да келиб тушган. Ёнғин-қутқарув экипажлари воқеа жойига соат 2:29 да етиб борган. Ўт ўчиришга жами 10 та экипаж жалб қилинди.
Ёнғин соат 3:24 да локализация қилиниб, соат 4:46 да тўлиқ ўчирилди. Жароҳатланганлар ҳақида маълумот йўқ.
Ижтимоий тармоқларда тарқалган видеоларда бозорнинг катта қисми ёнғиндан зарар кўрганини кўриш мумкин.
Мутахассислар ёнғин сабабларини аниқлаш ва етказилган зарар миқдорини баҳолаш ишларини давом эттирмоқда.
