Ўзбекистоннинг дунёвий мақоми ҳам диндорлар, ҳам дунёвий кишилар ҳуқуқларини бирдек ҳимоя қилиши керак. Бу ҳақда депутат, «Миллий тикланиш» партияси етакчиси Алишер Қодиров ўз Telegram-каналида Женнифер Лопеснинг Тошкентда бўлиб ўтган концерти ва пиво фестивалига изоҳ берар экан ёзди:
“Ўзбекистоннинг дунёвий давлат эканлиги тортишувсиз ҳақиқат. Дунёвий давлат кўпчилик сайлаган парламент томонидан қабул қилиниб, кўпчилик сайлаган президент томонидан маъқулланган қонунларни бузмаган ҳолда, ўзи истаганидек яшаш имкониятини беради.
Ватанимизда барча миллат ва дунёқарашдаги ватандошлар эркин, қонунларни бузмаган ҳолда фаровонликка интилиши учун шароит яратиш устувор мақсад эканлиги қатъий белгиланган. Ҳамма тенг ва ҳеч ким камситилмаслиги кафолатланган.
Агар бирор ватандош пиво ичмоқчи бўлса, ичади, бу унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас.
Алкоголни ичиш мумкин, лекин реклама қилиш мумкин эмас, бу амалдаги қонунда белгиланган. Албатта, парламент сайловларида мутлақо ғалаба қозонадиган бирор сиёсий куч қонунни ўзгартириб, алкоголни «миллий қадрият», бир жинслиларнинг оила қуриши талабини эса эркин танлов сифатида норма қилиши ҳам мумкин, бунга сиз ҳуқуқ берасиз…
«Миллий тикланиш» ҳар қандай тараққиёт қадриятларга таяниши керак деган ғоясида мустаҳкамлигини эслатиб қўймоқчиман.
Женнифер Лопеснинг концерти сердаромад ва ёпиқ тадбир, наркотик тарқатиб, давлатга қарши тарғибот қилмаса, ўтказади, танасини кўрсатиш унинг танлови, кўриш эса тадбирга билет олганларнинг танлови, дунёвийлик шу!
Лекин, худди шундай ўраниб юрмоқчи бўлган аёл ватандошнинг ҳам танлови қонун билан ҳимояланган. Яланғоч намойишини дунёвийлик деб қабул қилдик, энди ёпиниб юриш ҳуқуқига ҳам дахл қилмаслик кераклигини қабул қилайлик. Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопесга кўрсатган бағрикенглигимизни диндор аёлларимизга ҳам кўрсатайлик.
Дунёвийлик ишонганга ҳам, ишонмаганга ҳам тенг бўла олиш дегани, зўрнинг заифга ҳаётдан дарс бериши эмас.
Лопес рақсини тушуниш учун Маркеснинг дунё фалсафасини ўқиган бўлиш керак…”.
