2025 йил бошидан буён 7 ой ичида яна 60 та такси агрегатори солиқ органларининг ахборот тизимлари билан интеграциялашди, уларнинг сони 2024 йил охиридаги 155 тадан 215 тага етди, дея хабар берди Солиқ қўмитаси матбуот хизмати.
Такси йўловчилари 262,2 миллионта саёҳатни амалга оширди. Бу даврда такси бозори айланмаси 5 трлн сўмдан ошди.
Такси тўловларининг аксарияти нақд пул орқали амалга оширилади — умумий йўловчиларнинг 72,2% 3,6 трлн сўмни нақд пул билан тўлаган. Йўловчиларнинг 27,8% нақд пулсиз ҳисоб-китобни танлаган, улар 1,4 трлн сўмлик саёҳатларни амалга оширган.
Битта чекнинг ўртача нархи 19 077 сўмни ташкил этди, бир йил олдин, 2024 йил январь-июль ойларида эса — 18 003 сўм бўлган.
Қўмита маълумотларига кўра, 7 ой ичида агрегаторлар 98,8 млрд сўм солиқ тўлаган, шундан ҚҚС 55,4 млрд сўмни ташкил қилган.
Солиқ қўмитаси маълумотларига кўра, ҳайдовчиларнинг ярмидан кўпи (56,3%), 257,6 минг киши 30 ёшдан 50 ёшгача, 166,2 минг ҳайдовчи (36,3%) 30 ёшгача, 33,4 минг киши (7,3%) 50 ёшдан ошганлар.
Ҳозирда агрегаторлар орқали йўловчи ташиш билан 457,3 мингга яқин ўзини ўзи банд қилган ҳайдовчи шуғулланмоқда. Бу йил бошига нисбатан (498 минг) 40,7 минг кишига (8,2%) кам. Июнь ойида Ўзбекистонда такси ҳайдовчиларига фақат лицензия берилган ҳудудда ишлашга рухсат берувчи чекловлар қўлланила бошланди.
Бир йил олдин Солиқ қўмитаси илгари йўловчи ташиш соҳасида ноқонуний ишлаган 576,1 минг киши энди ўзини ўзи банд қилган сифатида рўйхатдан ўтганини маълум қилганди. Уларнинг 361 минг нафари агрегаторлар орқали ишлаган.
Аёл ҳайдовчилар сони ҳам камайган. Йил бошидан буён 7 ой якунларига кўра, уларнинг сони 3480 тани ташкил этган, йил бошида эса 4124 та бўлган.
1800 нафар ҳайдовчининг даромади 100 млн сўмдан ошди ва 2025 йил 2 июлдан бошлаб такси агрегаторлари уларнинг даромадларидан солиқларни автоматик равишда ушлаб қола бошлади.
7 ой ичида 10 ёшдан ошган такси автомобиллари сони кескин камайди — йил бошидаги 56,9%га нисбатан 27,7%.
Ҳайдовчилар орасида энг оммабоп автомобиллар учлиги сақланиб қолди, фақат дастлабки иккита модель ўрнини алмаштирди. 7 ой якунларига кўра, ҳайдовчиларнинг 23,5% Cobalt’дан (йил бошида Nexia етакчи эди — 17,8%, Cobalt эса 16,9% эди), 21,5% Nexia’дан, 16,9% Lacetti’дан фойдаланмоқда.
Электромобиллар улуши 1,2%дан 1,8%га ошди.
