Тошкент вилояти Жиноят ишлари бўйича Зангиота туман суди Келесда яшовчи 18 ёшли Аскар Гулматовнинг ўлдирилиши бўйича ҳукм чиқарди. Бу ҳақда Millar дастурида хабар берилди.
Ҳодиса 2025 йил 12 февраль куни тахминан соат 22:50 да Тошкент туманининг маъмурий маркази — Келес шаҳарчасидаги «Озодлик» маҳалласида 16−17−22-уйлар оралиғидаги болалар майдончасида содир бўлган.
Ўзбекистон Бош прокуратурасининг хабар беришича, 17 ёшли гумонланувчи А.С. маст ҳолатда таниши Аскар Гулматов билан жанжаллашиб қолиб, унга ошхона пичоғи билан бир неча марта зарба берган.
Шу билан бирга, марҳумнинг яқинлари уни кечки пайт бир гуруҳ ўсмирлар калтаклагани, сўнг ҳужум қилганлардан бири уйига югуриб бориб, ошхона пичоғини олиб келиб, Аскарга пичоқ урганини даъво қилган. Улар ҳужумчи унинг қорнига бир неча марта пичоқ ургани, кейин эса белига яна етти марта пичоқ урганини айтган.
Аскарнинг онаси судда ўғлига 12 марта пичоқ урилганини айтиб, айбланувчига умрбод қамоқ жазоси беришни талаб қилди.
«Иложи бўлса, умрбод қамалсин, у ерда умрбод ўтирсин, чунки ўғлимни қайтариб бўлмайди… [Судланувчи] 5-6 марта пичоқ урганимни айтяпти. Қолган [пичоқ зарбаларини] ким берди? Ахир 12 марта пичоқ урилган-ку. Ёки бўлмаса „мен 12 марта пичоқ урдим ва ғайриинсоний равишда ўлдирдим“, деб айтсин», — деди у судда.
У, шунингдек, айбланувчининг ёлғиз ҳаракат қилганига шубҳа билдириб, терговни давом эттиришни талаб қилди.
Телеканал Damas русумли автомобилга ёпиштирилган плакатни кўрсатди, унда қуйидагилар ёзилган:
«Аскар шафқатсизларча ўлдирилди! Кўп нарса бизга номаълум. Суд давомида ёлғон ва номувофиқликлар кўп бўлди. Биз иш қўшимча терговга юборилиши тарафдоримиз. Биз бегуноҳларни жазолашни истамаймиз. Алоқадор шахслар жазоланиши керак. Биз ҳақиқат тарафдоримиз. Бизни эшитинг!!!»
Плакатда, шунингдек, Аскар Гулматовнинг болалиги ва ўсмирлик давридаги суратлари, диплом ва медаллар билан тушган суратлари, шунингдек, «Аскар учун» ёзувли плакатлар ва мурожаатномалар кўтариб олган бир гуруҳ одамлар акс этган.
Телеканал сюжетида аниқлик киритилишича, судланувчи соғлиғи сабаб мажлисда онлайн шаклда иштирок этган. Айблов томони адвокатининг таъкидлашича, гувоҳларнинг кўрсатмаларига кўра, зарбалар ўта шафқатсизлик билан берилган — марҳумнинг ички органлари очилиб кетган.
Суд судланувчини Жиноят кодексининг 97-моддаси 1-қисмида (қасддан одам ўлдириш) назарда тутилган жиноятни содир этганликда айбдор деб топиб, 85-моддани қўллаган ҳолда, умумий тартибли колонияда жазони ўташ билан 8 йил муддатга озодликдан маҳрум қилиш жазосини тайинлади. Модданинг 1-қисми 10 йилдан 15 йилгача озодликдан маҳрум қилиш жазосини назарда тутади. Бироқ, Жиноят кодексининг 85-моддасига кўра, 16 ёшдан 18 ёшгача бўлган шахсларга оғир жиноят учун 7 йилгача ва ўта оғир жиноят учун 10 йилгача озодликдан маҳрум қилиш жазоси тайинланади.
