Тошкентнинг Мирзо Улуғбек туманидаги «Янги Ўзбекистон» боғидаги «Орзулар соҳили» пляжида 23 ёшли эркак дам олиш вақтида чўкиб кетди.
Бахтсиз ҳодиса 2025 йил 31 июль куни тушдан кейин чуқурлиги 170 см бўлган сув ҳавзасида содир бўлган. Дам олувчилардан бири А.А. қирғоқда турганида, С.Д. кўл ўртасида боши сувга ботган ҳолда, танаси эса сув юзасида ҳаракатсиз турганини кўрган. Унинг чўкаётганини гумон қилиб, А.А. унга сузиб борган. С.Д. ҳушсиз эканлигини аниқлаб, уни қирғоққа олиб чиққан.
Кўрсатилган тиббий ёрдамга қарамай, С.Д. вафот этган. Суд-тиббий экспертизаси маълумотларига кўра, ўлимга нафас йўлларининг сув билан тўсилиши натижасида юзага келган механик асфиксия сабаб бўлган.
Ҳодиса жойи тергов-тезкор гуруҳи аъзолари ва мутахассислар томонидан техник-криминалистик воситалар ёрдамида кўздан кечирилган, сув ҳавзасидан сув намуналари олинган.
Мирзо Улуғбек тумани прокуратураси терговга қадар текширув ўтказмоқда.