2026 йилда Ўзбекистонда Тошкент — Самарқанд ва Тошкент — Андижон йўналишларида пуллик автомобиль йўллари қурилиши бошланади. Бу Иқтисодиёт ва молия вазирлигининг 2028 йилгача бўлган Фискал стратегиясида қайд этилган.
Ҳужжатга кўра, лойиҳалар халқаро автомагистраллар ҳолатини яхшилаш, уларнинг ўтказиш қобилияти ва хавфсизлик даражасини оширишга қаратилган комплекс дастур доирасида амалга оширилади. Молиялаштириш илғор халқаро тажрибани ҳисобга олган ҳолда халқаро молия институтлари ҳисобидан амалга оширилади.
Бундан ташқари, темир йўл транспорти соҳасида «Ўзбекистон — Қирғизистон — Хитой» ва «Ўзбекистон — Афғонистон — Покистон» халқаро темир йўл линиялари қурилишида фаол иштирок этиш режалаштирилган.
Шунингдек, «Тошкент — Самарқанд» йўналиши бўйича юқори тезликдаги поездлар учун қўшимча янги темир йўл линияси қурилиши лойиҳасини бошлаш, «Нукус — Мискин — Урганч — Бухоро» янги юқори тезликдаги темир йўл линиясини фойдаланишга топшириш ва янги тезюрар поездларнинг (Жанубий Кореядан сотиб олинган — Hyundai Rotem) мунтазам ҳаракатини йўлга қўйиш бўйича чора-тадбирлар кўриш режалаштирилган.
2025 йил февраль ойида транспорт вазири Илҳом Маҳкамов пуллик трассалар қурилиши 2025 йилда бошланишини маълум қилган эди. Унинг сўзларига кўра, Тошкент — Андижон лойиҳасига 30 дан ортиқ компания қизиқиш билдирган.
2025 йил июль ойида Олий Мажлис Қонунчилик палатасидаги «Ҳукумат соати»даги нутқида у лойиҳанинг биринчи босқичи доирасида тендер жараёнларини якунлаш ва Тошкент — Андижон йўли қурилишига киришиш режалаштирилаётганини таъкидлади. Шунингдек, Тошкент — Самарқанд пуллик йўл лойиҳаси бўйича потенциал пудратчилар билан келишувлар имзоланиши кутилмоқда.
Самарқанд йўли лойиҳаси бўйича тендер 2025 йил январь ойида эълон қилинган, дастлабки аризаларни қабул қилиш эса 26 июнга режалаштирилган эди.
Июнь ойида транспорт вазири ўринбосари Жасурбек Чориев техник-иқтисодий асослаш ишлаб чиқилганидан сўнг лойиҳалар қайта кўриб чиқилгани ва уларнинг тахминий харажатлари камайтирилганини маълум қилди. У қурилишнинг бошланиши ҳам тендер иштирокчиларига боғлиқ бўлишини таъкидлаган.
