Ўзбекистон Республикасида хизмат кўрсатган маданият ходими, таниқли бастакор Султонали Раҳматов 55 ёшида вафот этди. Бу ҳақда Маданият вазирлиги матбуот хизмати хабар берди.
Унинг YouTube-канали фойдаланувчилари сўнгги ойларда артистнинг соғлиғида муаммолар борлигини хабар қилиб, унга тезроқ тузалиб кетишини тилашганди.
Султонали Раҳматов 1970 йил 13 январда Тошкентда туғилган. У ёшлигидан мусиқага қизиқиш билдирган ва Республика ихтисослаштирилган ҳарбий мусиқа мактаб-интернатини тамомлаган. Ёшлигидан таниқли бастакор Поль Мориа ва Enigma гуруҳи ижодига қизиққан, уларнинг мусиқаси унга таъсир кўрсатган.
1987 йилда Тошкент давлат консерваториясига (ҳозирги Ўзбекистон давлат консерваторияси) ўқишга кирган. “Ассалом Ўзбекистон” композицияси унга кенг машҳурлик келтирди — 1994 йилдан 2005 йилгача у “Ўзбекистон” телеканалидаги “Ассалом Ўзбекистон” ахборот-мусиқий дастурининг кириш мелодияси сифатида ишлатилган, шунингдек, мамлакатдаги турли байрам тадбирларида янграган.
У нафақат Ўзбекистонда, балки унинг ташқарисида ҳам ўнлаб композициялари, жумладан “Симфония №2” ва “Сирли дунё” туфайли машҳур бўлди. Унинг биринчи яккахон концерти 2006 йилда Қозоғистонда бўлиб ўтган. 2007 ва 2011 йилларда у Самарқанддаги Регистон майдонида концерт берган.
2006 йилда Нью-Йорк Қироллик академиясининг бастакори унвонига сазовор бўлган.
2010 йилда Ўзбекистон Республикасида хизмат кўрсатган маданият ходими унвонини олган.
“Султонали Раҳматов кўп йиллар давомида эстрада мусиқаси ва бастакорлик санъати соҳасида ижодий фаолият олиб борди, Ўзбекистон маданияти ривожига катта ҳисса қўшди”, — дейилади Маданият вазирлиги хабарида.
“Газета” нашри 2024 йил апрель ойида у билан интервью эълон қилганди.
“Яқинда менга эътибор қаратишди ва мен яна концерт беряпман. Умид қиламанки, бундан кейин ҳам яхши бўлади. Баъзилар мени чет элга кетган деб ўйлашди. Ҳа, хорижда яшаш ва ижод қилиш таклифлари бўлди. Лекин менинг мақсадим — ўз ватанимда ижод қилиб, шу ердан жаҳон саҳнасига чиқиш. Мен ўзбекман, Ўзбекистон — менинг юртим, менинг миллатим, менинг онам. Шу ерда тикланиб, мусиқамни дунёга тақдим этмоқчиман. Албатта, орзу ва ниятлардан ташқари, молиявий томон ҳам муҳим. Пул — нон ва сув каби: уларсиз илож йўқ”, — деганди у.
Шунингдек, у визит карточкасига айланган “Ассалом Ўзбекистон” кўрсатуви унинг мусиқасини олдиндан буюртма қилмасдан ишлатганини, аммо у дастур концепциясига уйғун тушиб, томошабинларнинг меҳрини тезда қозонганини таъкидлади.
“Мен шунчаки, бу мелодия эфирда бир марта янграйди ва тамом деб ўйлагандим. Уни телевидениега олиб келганимда, аввал у бошқа асардан кўчирилган деб ўйлашди. Лекин Ҳожиакбар исмли режиссёр: “Хафа бўлманг, ўзим кадрларни қўйиб, эфирга узатаман”, — деб айтган”, — деди Раҳматов.
Унинг сўзларига кўра, композиция кўрсатув руҳига мос тушиб, тез орада кенг машҳурликка эришган. “Одамлар хат ёзишган, у йиллар давомида эфирда янграган”, — деди у.
Бироқ, бастакорнинг қўшимча қилишича, асар учун муаллифлик ҳуқуқи узоқ вақт давомида тегишли тартибда расмийлаштирилмаган. “Муаллифлик ҳуқуқи ҳимояси йўқлиги сабабли ўтган йили судлашмоқчи бўлдик”, — дея хабар берган.
Самарқандда концерт
