Давлат хавфсизлик хизмати раиси, генерал-полковник Баҳодир Қурбонов 21 июль куни Кобулда Афғонистон миллий мудофаа вазири вазифасини бажарувчи Муҳаммад Ёқуб Мужоҳид билан учрашди. Бу ҳақда Афғонистон Мудофаа вазирлиги матбуот хизмати хабар берди.
Делегация таркибида ДХХ раиси ўринбосари генерал-майор Фаррух Мухторов ва Ўзбекистон Чегара қўшинлари қўмондони генерал-майор Салимжон Ҳусанов ҳам бор эди.
Вазирлик маълумотларига кўра, Ўзбекистон томони мамлакатдаги хавфсизлик ва иқтисодий ривожланиш даражасидан мамнунлигини билдирган, шунингдек, икки томонлама муносабатларни мустаҳкамлаш муҳимлигини таъкидлаган.
Бунга жавобан Муҳаммад Ёқуб Ўзбекистонга «халқаро майдонларда Афғонистонга нисбатан конструктив позицияси» учун миннатдорчилик билдирган ва 2 қўшни давлат ўртасидаги ҳамкорлик кенгайиб бораётганини қайд этган.
Учрашувда чегара ҳамкорлиги, коммуникацияларни ривожлантириш ва бошқа масалалар муҳокама қилинди.
2025 йил февраль ойида Афғонистон бош вазири ўринбосари в.б. Мулла Абдул Ғани Бародар Ўзбекистонга ташриф буюрган ва Бош вазир Абдулла Арипов билан учрашган эди. 10 турдаги товарларга божхона тўловларини камайтириш, газ қазиб олиш ва цемент заводига Ўзбекистон инвестициялари киритиш, электр узатиш линияларини 30 миллион долларга арзонлаштириш бўйича келишувларга эришилди ва бошқа масалалар муҳокама қилинди.
2025 йил июль ойи бошида Президент Шавкат Мирзиёев Бародар билан аллақачон учрашган эди. Афғонистон Ўзбекистон билан товар айирбошлашни 2 миллиард долларгача оширишни ва Марказий Осиё ва Россияга экспортни кўпайтиришни режалаштирган. Ўзбекистон кўпроқ электр энергияси етказиб беришга, тўқимачилик фабрикалари, цемент ишлаб чиқариш, нефтни қайта ишлаш заводлари, туз қазиб олиш ва қайта ишлашга сармоя киритишга тайёр.