Ўзбекистон ва Швейцария Ўзбекистоннинг Жаҳон савдо ташкилотига (ЖСТ) кириши доирасида бозорга кириш бўйича икки томонлама музокараларни якунлади. Бу ҳақда президентнинг ЖСТ масалалари бўйича вакили Азизбек Урунов ўзининг LinkedIn саҳифасида маълум қилди.
Унинг сўзларига кўра, тегишли протокол 2025 йил 21 июль куни Женевада имзоланган.
«Якунланган музокаралар рўйхатига яна бир ЖСТ аъзоси қўшилди — атиги бир нечтаси қолди! Мен иккала жамоага — Ўзбекистон ва Швейцарияга — катта ва конструктив иш учун миннатдорчилик билдирмоқчиман», — деб ёзди у.
Урунов «узоқ рўйхат аста-секин йўқолиб бораётгани, тескари ҳисоб бошланганини» қўшимча қилди.
2024 йил май ойида президент Шавкат Мирзиёев йил охиригача ЖСТга кириш бўйича қолган 9 та давлат билан икки томонлама музокараларни якунлаш, Ишчи гуруҳнинг яна иккита йиғилишини ўтказиш ва унинг якуний ҳисоботи лойиҳасини тайёрлашни якунлаш бўйича топшириқ берган эди.
Эслатиб ўтамиз, жорий йилнинг март ойига қадар 21 та давлат билан музокаралар якунланган эди. Президентнинг ЖСТ масалалари бўйича махсус вакили Азизбек Урунов Ўзбекистон Россия, Европа Иттифоқи, Буюк Британия, Швейцария ва бошқа давлатлар билан музокараларни якунлаши кераклигини таъкидлаган эди.
