АҚШ президенти Дональд Трамп ташкилотнинг «Америкага қарши ва Исроилга қарши» кун тартиби туфайли АҚШнинг ЮНЕСКОдан чиқиши ҳақида қарор қабул қилди. Бу ҳақда New York Post Оқ уйга таяниб, Reuters эса икки европалик дипломатга таяниб ёзмоқда.
Оқ уй матбуот котиби ўринбосари Анна Келлининг сўзларига кўра, Трамп маъмурияти ЮНЕСКОнинг хилма-хиллик, тенглик ва инклюзивлик (DEI, diversity, equity and inclusion) соҳасидаги сиёсатидан, шунингдек, унинг «Фаластин тарафдори ва Хитой тарафдори позицияси»дан норози.
«Президент Трамп Қўшма Штатларни ЮНЕСКОдан чиқаришга қарор қилди, чунки бу ташкилот соғлом фикрга мутлақо зид бўлган, қарама-қарши ва низо келтириб чиқарувчи маданий ва ижтимоий мақсадларни қўллаб-қувватлайди», — деди Келли NYPга.
АҚШ 1945 йилда ЮНЕСКО ташкил топган пайтда унга аъзо бўлган, аммо 1984 йилда молиявий фирибгарликлар ва «Америкага қарши нохолислик»га норозилик сифатида ташкилотдан биринчи марта чиқиб кетган. 2003 йилда, қарийб 20 йиллик танаффусдан сўнг, мамлакат яна БМТ агентлигига қўшилган.
2017 йилда Трамп ўзининг биринчи президентлик муддатида ташкилотнинг «Исроилга қарши нохолислиги»ни сабаб қилиб, ЮНЕСКОдан чиқишга фармойиш берган эди.
2023 йилда, Жо Байден президентлиги даврида, Қўшма Штатлар ЮНЕСКО таркибига қайтди ва ташкилот олдидаги аъзолик бадаллари бўйича қарзларини тўлашни ваъда қилди. Байденнинг таъкидлашича, Американинг мавжудлиги Хитойнинг агентликдаги ўсиб бораётган таъсирига қарши туриш учун зарур.
