Сурхондарё вилоятининг Жарқўрғон туманида адвокат катта миқдордаги пулни олаётганда қўлга олинди, дея хабар берди Ўзбекистон Давлат хавфсизлик хизмати (ДХХ) матбуот хизмати.
ДХХ маълумотларига кўра, у туман судида кўриб чиқилаётган жиноят иши бўйича айбланувчидан 60 минг доллар талаб қилган. Ушбу сумма эвазига суд тизимидаги таниш мансабдор шахслар орқали озодликдан маҳрум қилиш билан боғлиқ бўлмаган жазо тайинланишига ёрдам бериш ваъда қилинган.
Адвокат 50 минг долларни олаётганда қўлга олинган, пуллар ашёвий далил сифатида олинган.
Адвокатга нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик) ва 211-моддаси 3-қисми «а» банди (жуда кўп миқдорда пора бериш) бўйича жиноят иши қўзғатилган. Унга нисбатан қамоққа олиш тарзидаги эҳтиёт чораси қўлланилган. Тергов давом этмоқда.