Ўзбекистон Марказий банки Citibank AS ваколатхонасини аккредитациядан ўтказди, дея хабар берди регулятор матбуот хизмати.
Citibank AS — Американинг Citibank’ининг Туркияда рўйхатдан ўтган шўъба тузилмаси. Citibank дунёнинг 180 дан ортиқ мамлакатида чакана, корпоратив ва инвестицион банк хизматларини кўрсатади.
Ваколатхона мамлакат молия бозорини ўрганиш ҳамда давлат органлари ва молия ташкилотлари билан ҳамкорликни кенгайтириш мақсадида ташкил этилган, дейилади хабарда.
Spot маълумотига кўра, Тошкентда тез орада ваколатхона офиси очилади. Унинг раҳбари этиб Аббос Жўрабоев тайинланган. Лицензия 3 йил муддатга — 2028 йил 9 июлгача берилган.
Американинг Citigroup корпорациясининг Ўзбекистонда шўъба банки ваколатхонасини очиш режалари 2023 йил сентябрь ойида Нью-Йоркда Президент Шавкат Мирзиёев ва Citigroup раиси Жон Дуган ўртасидаги учрашувда маълум бўлган эди.
Ўшанда давлат раҳбари ушбу ташаббусни қўллаб-қувватлаган ва Америка корпорацияси билан самарали ҳамкорликни таъкидлаган эди, унинг кўмагида Ўзбекистон банклари ва давлат корхоналарининг облигациялари халқаро фонд бозорларида муваффақиятли жойлаштирилган эди.
