Ўзбекистон Олий Мажлиси Қонунчилик палатаси 2025 йил 8 июль куни учинчи ўқишда хорижда 90 кундан ортиқ бўлган фуқароларнинг қайтиб келганидан сўнг ОИВга тиббий кўрикдан ўтиш мажбуриятини юклайдиган қонунчиликка тузатишларни қабул қилди. Бу ҳақда парламент қуйи палатаси матбуот хизмати хабар берди.
Хусусан, ҳужжат «Одам иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида»ги ва «Аҳолининг санитария-эпидемиология осойишталиги тўғрисида»ги қонунларга ўзгартиш ва қўшимчалар киритади. Ҳужжат Олий Мажлис Сенатига тасдиқлаш учун юборилди.
Бу тартиб, кутилишича, 18 ёшдан 60 ёшгача бўлган Ўзбекистон фуқароларига, шунингдек, мамлакат ҳудудида доимий яшовчи ёки ишлаш учун Ўзбекистонга келаётган чет эл фуқаролари ва фуқаролиги бўлмаган шахсларга татбиқ этилади.
90 кунлик муддат юқумли касалликлар, жумладан, ОИВнинг инкубация даври билан боғлиқ. Бунда Ўзбекистон фуқароларини текшириш давлат бюджети маблағлари ҳисобидан, чет эл фуқаролари ва фуқаролиги бўлмаган шахсларни эса ўз маблағлари ёки иш берувчининг маблағлари ҳисобидан амалга оширилади.
Аввалроқ «Миллий тикланиш» партияси фракцияси йиғилишида 2024 йилда хориждан қайтган 1,7 миллион фуқародан фақат 25% ОИВга ихтиёрий равишда текширувдан ўтгани хабар қилинган эди. Вирус 1512 кишида аниқланган. Қонун лойиҳасини муҳокама қилиш чоғида «меҳнат миграциясининг ўсиши ва қайтаётган фуқаролар сонининг кўпайишини ҳисобга олиб, инфекцияларни эрта аниқлаш чораларини кучайтириш зарур»лиги қайд этилди.
Қонунчилик палатасида 2025 йил 10 июнь куни қонун лойиҳасини ишлаб чиқишда Жанубий Корея, Япония, Россия, Польша, Швеция, Қозоғистон ва Қирғизистон тажрибаси инобатга олингани қайд этилди.
ЎзЛиДеП депутати Шаҳноза Ҳолмаҳамаматованинг таъкидлашича, 2024 йил 1 январь ҳолатига кўра, Ўзбекистонда ОИВ билан яшаётган 50 мингга яқин киши расман рўйхатга олинган. Унинг сўзларига кўра, мигрантлар орасида ОИВ инфекцияси ҳолатлари 23,7 фоизга ошган.
Эслатиб ўтамиз, 2024 йилда хорижда ишловчи Ўзбекистон фуқаролари сони бир ярим баробарга, 1,3 миллион кишигача камайган. Россияда уларнинг сони 1,7 баробарга, қарийб 700 минг кишигача қисқарган.
