2025 йил 11 июлдан бошлаб Ўзбекистонда инглиз тилини билиш даражаси бўйича халқаро IELTS сертификатини олиш учун тестнинг қоғоз шаклини қабул қилиш тўхтатилди. Тестларни ҳозирча фақат компьютерда топшириш мумкин бўлади.
Бу тест топшириқларининг интернетга сизиб чиқиши ҳақидаги хабарлар фонида юз берди.
2025 йил 8 июль куни Ўзбекистонда имтиҳон ўтказувчи Edu-Action Centre маркази IELTSнинг ҳамкор ташкилотлари (IDP, British Council, Cambridge University Press & Assessment) мамлакатда қоғоз тестларни «операцион сабаблар туфайли» тўхтатиб қўйишини маълум қилди. Улар қачон қайта тикланиши ва умуман тикланиши номаълум.
Қоғоз имтиҳонга рўйхатдан ўтганлар компьютер тестини топширишлари ёки пулларини қайтариб олишлари мумкин. Тафсилотларни аниқлаш учун номзод тестга рўйхатдан ўтган ташкилот — Edu-Action Centre ёки British Council (31 июлгача) билан боғланиши керак.
IELTS тести Ўзбекистоннинг 4 шаҳрида IDP орқали ва 12 шаҳрида British Council орқали қабул қилинади.
