Хоразм вилояти Янгиариқ тумани жиноят ишлари бўйича судининг тергов судьяси М. С. пора олишда гумонланмоқда, деб хабар берди Олий суд матбуот хизмати.
Давлат хавфсизлик хизмати маълумотларига кўра, у Урганч шаҳар фуқаросидан Тупроққалъа тумани судида кўриб чиқилаётган жиноят иши бўйича Жиноят кодексининг 210-моддаси (Пора олиш) билан оқлов ҳукми чиқариш учун ўз ҳамкасблари ёрдамида 15 минг доллар талаб қилган. Унга 2000 доллар нақд пул ва 24 миллион сўм пластик картасига ўтказилган.
Хабарда қайд этилишича, судья ўз ваъдасини бажармаган ва Давлат хавфсизлик хизмати, Олий суд ва Бош прокуратура ходимлари томонидан аввал олинган пулларни қайтараётган вақтида қўлга олинган.
2025 йил 3 июль куни Олий суд Пленуми Бош прокурорнинг судьяни Жиноят кодексининг 168 (Фирибгарлик) ва 211 (Пора бериш) моддалари билан жиноий жавобгарликка тортиш, шунингдек, қамоққа олиш тарзидаги эҳтиёт чорасини қўллаш тўғрисидаги илтимосномасини қаноатлантирди.
«Суд тизимида коррупцияга қарши қатъий ва бескомпромисс чоралар кўрилмоқда. Суд органларини инсофсиз кадрлардан тозалаш бўйича изчил ишлар олиб борилмоқда», — дейишди Олий судда ва фуқароларни коррупцияни йўқ қилишда ҳамкорликка чақирдилар.
Туман ва шаҳар жиноят ишлари бўйича судларида тергов судьяси лавозими 2025 йил 1 январдан жорий этилган эди. Уларнинг вазифаларига жиноят ишлари бўйича судга қадар иш юритиш босқичида процессуал қарорларга санкция бериш киради.
