Олий Мажлис Қонунчилик палатасининг 2025 йил 1 июль куни бўлиб ўтган мажлисида қора ва рангли металл парчалари ҳамда чиқиндиларини тайёрлаш, қайта ишлаш ва сотиш, шунингдек, табиий газни улгуржи ва чакана савдо қилиш фаолиятини лицензиялаш тартибини жорий этувчи қонун лойиҳаси биринчи ўқишда кўриб чиқилди ва қабул қилинди. Бу ҳақда парламент қуйи палатаси матбуот хизмати хабар берди.
Қонун лойиҳаси қора ва рангли металл парчалари ва чиқиндилари, табиий газ савдоси соҳасига хусусий секторни жалб қилиш, шунингдек, рақобатбардош ва очиқ бозор муҳитини яратишга қаратилган. Бу Ўзбекистон қонунчилигини Жаҳон савдо ташкилоти нормалари билан уйғунлаштириш жараёнининг бир қисми бўлиб, мамлакатнинг унга аъзо бўлишга тайёргарлиги доирасида амалга оширилмоқда.
Ҳужжатда «Лицензиялаш, рухсат бериш ва хабардор қилиш тартиб-таомиллари тўғрисида»ги ва «Давлат божи тўғрисида»ги қонунларга ўзгартиш ва қўшимчалар киритиш назарда тутилган.
Лойиҳага кўра, лицензияларни Тоғ-кон саноати ва геология вазирлиги ҳамда «Ўзенергоинспекция» беради.
Адлия вазири ўринбосари Маҳмуд Истамов таъкидлаганидек, бу йўналишлар стратегик аҳамиятга эга ҳисобланиб, уларни лицензиялаш орқали тартибга солиш шаффофликни таъминлайди ва бозор интизомини кучайтиради.
«Агар ушбу қонун лойиҳаси қабул қилинса, хусусий секторнинг табиий газ савдосига жалб қилиниши ҳисобига мамлакатимизнинг чекка ҳудудларини газ билан таъминлаш йўлга қўйилади. Бу соҳага инвестициялар ва инновациялар жалб қилинади ва, шубҳасиз, давлат корхоналарининг устун мавқеи босқичма-босқич камаяди, бу соҳада рақобат тамойили ўрнатилади», — дея тушунтирди Маҳмуд Истамов.
Эслатиб ўтамиз, 2025 йилда «Ўзвторцветмет», «Ўзметкомбинат», «Ўзкимёсаноат», «Ўзтрейд», «Ўзкимёимпекс», «Ўзэнергосотиш» ва «Ўзтрансгаз» каби қатор давлат компанияларининг эксклюзив ҳуқуқлари бекор қилинган эди.
