Le Monde нашри 48 ёшли ўзбекистонлик тадбиркор ва банкир Қаҳрамонжон Олимовнинг ўғирланиши ҳақидаги воқеани баён қилди. Материал учун манба жабрланувчининг Франциянинг бандитизмга қарши кураш бригадаси (BRB) берган кўрсатмалари бўлди.
Воқеалар ривожи
Тадбиркор Парижга 2025 йил июнь ойи охирида учиб келган – у Францияда тез-тез бўларди ва француз ҳамкорлари билан учрашув учун саёҳатни режалаштирган эди. Бундан ташқари, у кўчмас мулк сотиб олиш бўйича битимни якунлашни ният қилган.
2025 йил 21 июнь куни у котибаси билан Тошкентдан Парижга учиб келди. Ўша куни кечқурун меҳмонхона барида унга ўзини Анастасия деб таништирган нотаниш аёл яқинлашди. Тахминан 25 ёшли, «узун қора сочли», «кавказ типидаги» қиз рус ва инглиз тилларида гапирган, Туркиядаги гўзаллик салонида ишлашини даъво қилган, аммо Олимовнинг таъкидлашича, ҳашаматли аксессуарлар – Louis Vuitton пиджаги ва Tiffany билагузуги – бу ҳикояга мос келмаган.
Тадбиркор унга телефон рақамини берган, аммо ўша кеча яна учрашиш таклифидан воз кечган. Эртаси куни эрталаб, нашр ёзишича, у Анастасия деярли бутун тун унга хабарлар юборганини аниқлаган ва эркак унинг балиқ ресторанида тушлик қилиш таклифига рози бўлган.
Тушлик учун меҳмонхонадан бир неча қадам наридаги Жорж Гийомен майдонига яқинлашганида, уларни қалин соқолли нотаниш киши тўхтатган.
«Кел, гаплашиб олишимиз керак», – деди у русчада кучли «чечен акценти» билан. 2 киши эса шу пайт банкирни бўғиб, қўлларини қайириб, микроавтобусга тиқишган. Олимов «Полицияга қўнғироқ қил!» деб қичқириб, телефонини қизга ташлаб юборишга улгурган, аммо қиз буни қилмаган.
«Ниҳоят сени қўлга олдик»
Банкирнинг ҳикоясига кўра, микроавтобус бир неча соат юриб, баланд деворли уйга етиб борган. У ерда Олимов ўғирловчилардан бирида ўзи «қонундаги ўғри» ва нуфузли жиноий гуруҳ аъзоси деб атаган шахсни таниган.
Унинг сўзларига кўра, бу М. исмли шахс йирик банкдаги Олимовнинг собиқ ҳамкори Б. Р.нинг ишончли вакилидир (2017 йилда Олимов «Капиталбанк» бошқаруви раиси бўлиб ишлаган, у ерда унинг 36% дан ортиқ улуши бўлган). Тахминан 10 йилдан бери бу собиқ ҳамкор Олимовни унинг «ноқулай аҳволи ва Туркияга вақтинчалик бадарға бўлишидан» фойдаланиб, банкдаги улушини сотиб олганликда айбламоқда.
«Ниҳоят сени қўлга олдик! Сен менга 10 миллион доллар қарздорсан», – деган ўғирловчилардан бири ва Олимовни урган.
Le Monde ёзишича, бундан сўнг 3 соатлик калтаклаш ва осиш саҳналаштирилган. Шундан сўнг банкирни яна фургонга ўтқазиб, Ниццадаги вилланинг ертўласига олиб боришган. У ерда уни «уй кинотеатри»га айлантирилган хонага жойлаштиришган ва ушлаб туриб, қийноққа солишни давом эттиришган.
Ўғирловчи Олимовнинг Европадаги активлари ва инвестициялари ҳақида билганини, тадбиркорнинг фарзандлари ҳақида гапирганини ва банкирнинг шахсий котибасини ҳам ўғирлаш билан таҳдид қилганини айтган.
Охир-оқибат, Олимовни 5 миллион доллар қарз ҳақидаги тилхатни имзолашга мажбурлашган. Тадбиркор ўз ҳайдовчиси орқали Тошкентдаги воситачига 200 минг доллар аванс ўтказган.
Озод қилиш ва тергов
Бу биринчи тўлов ўғирловчиларни гаровга олинганни озод қилишга ишонтирган. Олимовни Ниццадаги вокзалгача олиб боришган, у ердан поездда Парижга жўнаб кетган ва дарҳоол полицияга мурожаат қилган. Франция полицияси уюшган гуруҳ томонидан ўғирлаш бўйича иш очган ва бир «турк миллатига мансуб» гумонланувчини ҳибсга олган.
Сўроқдан сўнг дарҳол Олимов Тошкентга қайтиб, ўз хавфсизлигини таъминлаш учун қўриқчи ёллаган. Бироқ, нашр маълумотларига кўра, ўғирлашнинг тахминий ташкилотчиси унга Telegram орқали таҳдидлар ва талаблар юборишни давом эттирмоқда. У шунингдек, полицияга берилган аризадан ҳайрон бўлиб, буларнинг барчаси «ҳазил» бўлганини айтган.
Қаҳрамонжон Олимов 2020 йилда ташкил этилган ва «миллиард доллардан ортиқ активларни бошқарадиган» Anorbank рақамли банкининг 99,38% акцияларига эгалик қилади, шунингдек, Нидерландияда рўйхатдан ўтган компания орқали EDF билан биргаликда Ўзбекистоннинг Сурхондарё вилоятида газ турбинали комбинациялашган циклдаги электр станцияси қуриш лойиҳасида иштирок этади.
Тадбиркор Milliy To`lov Tizimlari (Hamyon хизмати), Clever Mikromoliya Tashkiloti микромолия ташкилоти, Distri For Country (тўловларни йиғиш агентликлари ва кредит бюролари фаолияти), Anor Assets (молиявий лизинг) ва Dynamic Energy (иссиқлик электр станциялари томонидан электр энергияси ишлаб чиқариш) компанияларидаги улушларга ҳам эгалик қилади. 2023 йилда унинг Ўзбекистондаги bi1 (француз супермаркетлари тармоғи) компаниясининг ҳаммуассиси бўлгани хабар қилинган эди.
ОАВда акциядорнинг ўғирланиши ҳақидаги хабарлардан сўнг Anorbank ушбу ҳодиса шахсий хусусиятга эга эканлиги ва молия муассасаси фаолиятига таъсир қилмаслиги ҳақида баёнот берди. Банк бўлимлари ва хизматлари барқарор ишламоқда, деб таъкидлади банк.
