2025 йил 2 июндан 30 июнгача Тошкент шаҳри Шайхонтоҳур туманидаги “Эски жўва” бозорида совутилган импорт мол ва қўй гўшти нархлари 3,5%дан қарийб 10%гача ошди. Бу Иқтисодиёт ва молия вазирлигининг озиқ-овқат маҳсулотларининг улгуржи нархлари тўғрисидаги кунлик маълумотларни эълон қилувчи мониторингидан келиб чиқмоқда.
Умуман олганда, мол гўштининг минимал (73 минг) ва максимал (95 минг) нархи ўзгармаган, аммо қўй гўштиники 82−95 мингдан 85−105 минг сўмгача (+3,6%-10,5%) ўсган.
Бир килограмм совутилган импорт мол гўштининг нархи 79−85 мингдан 80−88 минг сўмгача ошди – ўсиш 3,5%гача бўлди.
Қўй бўйин гўшти (баранья шейка) 85−90 мингдан 90−95 минг сўмгача қимматлашди (ўсиш – 5,9%гача), қовурға – 82−90 мингдан 85−92 минг сўмгача (+3,7%).
Энг кўп совутилган импорт қўй гўштининг нархи ўсди: ой бошида килограмми 94−96 минг сўм бўлган бўлса, июнь охирига келиб 100−105 минг сўмгача етди – ўсиш 9,4%ни ташкил этди.
Таъкидлаш жоизки, Статистика миллий қўмитасининг 2025 йил июнь ойидаги ҳисоботида мол ва қўй гўшти нархларнинг энг кўп ўсган ёки камайган маҳсулотлар рўйхатида алоҳида кўрсатилмаган.
Таққослаш учун: 2024 йил июнь ойида, Статистика миллий қўмитаси маълумотларига кўра, мол гўштининг ўртача нархи 0,7%га, қўй гўштиники – 1%га, 2023 йил июнь ойида эса мос равишда 1,2% ва 1,1%га ўсган.
Божхона қўмитаси маълумотларига кўра, 2025 йил январь-май ойларида гўшт маҳсулотларининг умумий импорти қиймат жиҳатидан 38,5%га – 193,7 млн доллардан 268,3 млн долларгача ўсган. Товуқ гўштидан ташқари (бироз камайган) деярли барча позициялар бўйича ҳажмлар ошган.
Йирик шохли қорамол (ЙШҚ) гўшти импортнинг асосий маҳсулоти бўлиб қолмоқда: харидлар ҳажми 50%га – 35,2 млн кг дан 52,8 млн кг гача ўсган. ЙШҚ гўшти импорти қиймати 139,3 млн доллардан 214 млн долларгача (+53,7%) ошган. 1 кг импорт мол гўштининг нархи атиги 2,5%га – 3,96 доллардан 4,06 долларгача ўсган.
Қўй гўшти қарийб 3 баравар ўсишни кўрсатди: импорт 3,3 млн кг дан 9,1 млн кг гача ўсди. Қиймат жиҳатидан харидлар 16,7%га – 9,6 млн доллардан 11,2 млн долларгача ошди. Нарх қарийб 2,5 баравар – 2,9 доллардан 1,23 долларгача (кг учун) тушди.
Товуқ гўшти, аксинча, ҳажм жиҳатидан 2,5%га – 22,9 млн кг дан 22,3 млн кг гача камайди, бироқ уни сотиб олиш харажатлари 3%га – 26,5 млн долларгача ўсди.
2025 йил июнь ойи охирида Ўзбекистонда қўй ва мол гўшти нархи бир йилда мос равишда 32,3% ва 30,5%га ошгани ҳақида хабар берилганди. Сенатор ички бозорда гўшт таклифини ошириш ва нархларни барқарорлаштириш учун нималар режалаштирилаётганини сўради. Иқтисодиёт ва молия вазирлиги ҳамда Чорвачиликни ривожлантириш қўмитаси амалга оширилаётган чора-тадбирлар ҳақида сўзлаб берган.
