Roodell компанияси реклама тўғрисидаги қонунчилик талабларига риоя қилмаганлиги учун жавобгарликка тортилди, дея хабар берди Ўзбекистон Монополияга қарши курашиш қўмитаси.
Қўмита маълумотларига кўра, компания рекламасида “Kia Sonet автомобили 0%га бўлиб тўлаш шарти билан” таклиф қилинган. Шу билан бирга, шартноманинг муҳим шартлари, жумладан, қўшимча тўловлар ҳақидаги маълумотлар мавжуд эмас эди, бу “Реклама тўғрисида”ги қонуннинг 43-моддасига зид, дейилади хабарда.
“Натижада истеъмолчиларда нотўғри тасаввур пайдо бўлди ва ҳақиқатга мос келмайдиган маълумотларга асосланиб қарор қабул қилиш имконияти юзага келди”, — дейилади қўмита хабарида.
Қўмитанинг махсус комиссияси томонидан иш қўзғатилган бўлиб, унинг якунлари бўйича Roodell’га нисбатан жарима солинди. Бундан ташқари, қоидабузарликларни бартараф этиш ва келажакда уларга йўл қўймаслик бўйича кўрсатмалар берилди.
Компания Roodell Kia, Chery, Haval ва Hyundai Truck & Bus русумли автомобилларни йиғиш ва ишлаб чиқариш билан шуғулланувчи ADM Jizzakh заводининг эгаси ҳисобланади.
Рақобат қўмитаси барча хўжалик юритувчи субъектларни “аниқ, шаффоф ва холис маълумотларни, айниқса реклама фаолиятида тақдим этишга” чақирди.