Ички ишлар вазирлиги ҳузуридаги Тергов департаменти матбуот хизмати хабар беришича, тергов версиясига кўра, арзон фоизли кредитга автомобиль сотиб олиш бўйича шартномалар тузиб, пулларни ўзлаштирган фуқаролар гуруҳи қўлга олинган.
Вазирлик жиноий фаолиятда айбланаётган шахсларнинг фотосуратларини эълон қилди. Департамент маълумотларига кўра, улар Нукус, Андижон, Наманган, Фарғона, Сирдарё, Самарқанд, Бухоро, Навоий, Хоразм, Сурхондарё, Қашқадарё вилоятларида «ишлаган».
Гуруҳ аъзолари фуқароларга арзон фоиз ставкалари (6-12%) билан автомобиль етказиб беришни ваъда қилиб, улар билан дастлабки (аванс) шартномалар тузган. Бироқ, 120 кун ичида ваъда қилинган автомобиллар етказиб берилмаган, фуқаролардан келиб тушган пул маблағлари эса ўзлаштирилган.
Тергов маълумотларига кўра, айбланувчилар турли номлар остидаги компаниялар номидан иш олиб борган, улар орасида: Umid avto companies, Umid Savdo Fayz Invest, Umid Avto Lizing, Umid Auto, Group Of Companies Ual, Umid Avto-Tashkent, Orient Auto, Umid Lizing Tashkent, Orient Avto-Lizing, Umid Auto Leasing, Group of Orient Auto, Imkon Auto Xizmati, Umid Avto Companies, Busines Orientauto, Umid Auto Xizmati, Orient Auto Hamkor, Imkon Avto Markaz, Avtovariant, Ava Orientauto, Ava Umidavto, Avto Ijara Hizmati, Umid Auto Business Toshkent, Orient Auto Leasing, Orient Auto Toshkent, Ilgor Lizing, Orient Finans Lizing ва бошқалар бор.
Мазкур ҳолат юзасидан Ўзбекистон Республикаси Жиноят кодексининг 168-моддаси 4-қисмининг «а» ва «в» бандлари (Фирибгарлик, жуда кўп миқдорда, уюшган гуруҳ томонидан ёки унинг манфаатларини кўзлаб) бўйича жиноят иши қўзғатилган.
Тергов доирасида 843 нафар фуқаро жабрланувчи деб топилган, етказилган зарар миқдори 50,1 миллиард сўмни ташкил этган. Тўққиз нафар шахсга қамоққа олиш тарзидаги эҳтиёт чораси қўлланилган. Ички ишлар вазири ўринбосари Рамазон Ашропов раҳбарлигида ушбу иш бўйича тезкор штаб тузилган. Штаб ҳар куни соат 9:00 дан 21:00 гача ИИВ Транспорт ва туризм объектларида хавфсизликни таъминлаш департаменти биносида, Тарас Шевченко кўчаси, 62-уйда фаолият юритмоқда. Телефон: 71-256-79-39.
«Фуқаролардан фотосуратда тасвирланган шахсларнинг жиноий фаолияти ҳақида маълумотга эга бўлганлар, шунингдек, юқорида кўрсатилган ва бошқа шу каби ташкилотларнинг ноқонуний фаолиятидан жабрланганлар тезкор штабга ёки 102 қисқа рақамига мурожаат қилишларини сўраймиз», — деб чақирди ИИВ.
