City Football Group (CFG) компанияси, жумладан, «Манчестер Сити» футбол клуби эгалари Ўзбекистон футбол клубларидан бирини сотиб олиш имкониятини кўриб чиқмоқда. Бу ҳақда жума куни журналистлар билан учрашувда Ўзбекистон Миллий олимпия қўмитаси раисининг биринчи ўринбосари Отабек Умаров маълум қилди.
Унинг сўзларига кўра, ўзбекистонлик футболчи Абдуқодир Ҳусановнинг «Манчестер Сити»га ўтиши инглиз клубига минтақадан миллионлаб янги мухлисларнинг қўшимча эътиборини тортди.
«Агар Ўзбекистонда тахминан 37-38 миллион аҳоли истиқомат қилса, футболчимиз туфайли Марказий Осиёнинг бошқа мамлакатларидан ҳам мухлислар «Манчестер Сити» жамоасини мунтазам кузатиб боришмоқда», — деди Отабек Умаров.
Унинг сўзларига кўра, City Football Group’нинг яна бир ўзбекистонлик футболчини таклиф қилиш ва Ўзбекистон клубини ўз халқаро гуруҳига киритиш режалари бор (инсайдерларнинг маълумотига кўра, бу клуб «Қўқон-1912» бўлиши мумкин). «Уларнинг олдида яна режалар бор: яна бир спортчи, Ўзбекистондан футболчи таклиф қилиш, шунингдек, ҳозирда 12 та спорт, футбол жамоаси мавжуд бўлган ўз гуруҳларига 13-жамоа сифатида Ўзбекистондан клубни олиш», — деди у.
Отабек Умаровнинг таъкидлашича, август ойида Ўзбекистон делегациясининг Англияга ташрифи режалаштирилган бўлиб, унда жамоани тайёрлаш, футболчиларни танлаш ва ўқитиш жараёни билан танишилади.
«Биз қатор режаларни белгилаб олдик. Бу йўналишда ҳали олдимизда кўп иш бор», — дея таъкидлади Миллий олимпия қўмитаси биринчи ўринбосари.
2025 йил январь ҳолатига кўра, Ўзбекистон чемпионати (Суперлига)даги 16 та футбол клубидан фақат 3 тасида — «Динамо», «Пахтакор» ва «Сурхон»да хусусий ҳомийлар (Agromir, Akfa ва Eriell) бор эди. Қолган жамоалар давлат компаниялари, жумладан, «Ўзбекнефтгаз», вилоят ҳокимликлари ва бошқалар томонидан молиялаштирилади.
Давлат органлари балансидаги футбол клубларини сотиш президентнинг 2023 йил 24 мартдаги қарорида назарда тутилган эди. Тошкентнинг «Пахтакор» клуби 2024 йил январда 24,1 гектар ер участкаси билан бирга савдога қўйилган, бироқ жамоатчилик объектни ер билан бирга сотишга қарши чиққани сабабли хусусийлаштириш тўхтатиб қўйилган эди.
CFG ҳақида
City Football Group — бу дунёдаги энг йирик спорт холдинг компанияси бўлиб, бутун дунё бўйлаб футбол клублари тармоғига эгалик қилади, уларни бошқаради ёки бошқарувида иштирок этади. Гуруҳнинг бош активи — инглиз клуби «Манчестер Сити».
CFG Абу-Даби ҳукумат фонди бошчилигидаги консорциумга тегишли (Abu Dhabi United Group назорат пакетига эга). Акциядорлар орасида бошқа йирик инвесторлар, жумладан, Американинг Silver Lake компанияси ва Хитойнинг China Media Capital медиа-гуруҳи ҳам бор.
Бугунги кунда CFG портфелида турли мамлакатларда 13 та футбол клуби мавжуд, жумладан, «Баия» (Бразилия), «Ломмел» (Бельгия), «Нью-Йорк Сити» (АҚШ), «Мельбурн Сити» (Австралия), «Монтевидео Сити Торке» (Уругвай), «Жирона» (Испания), «Палермо» (Италия), «Йокогама Ф Маринос» (Япония), «Труа» (Франция), «Мумбаи Сити» (Ҳиндистон), «Сичуань Цзюню» (Хитой) ва ҳамкор клуб «Боливар» (Боливия).
