2025 йил 25 июнга ўтар кечаси Тошкент халқаро аэропортидан Qanot Sharq авиакомпаниясининг самолёти тарихда илк бор Индонезиянинг Бали оролига тўғридан-тўғри парвозни амалга оширди. Тўғридан-тўғри авиақатнов Asialuxe Travel туроператори ва хусусий авиаташувчи ҳамкорлиги натижаси.
Парвоз вақти 10 соатни ташкил этди. Илгари парвозлар Истанбул, Дубай ва Куала-Лумпур орқали амалга оширилар эди. Жануби-Шарқий Осиёнинг энг машҳур курортларидан бири бўлган Балига етиб бориш учун 15-20 соат керак бўларди.
Бортида 265 нафар йўловчи бўлган Airbus A330 самолёти маҳаллий вақт билан соат 14:00 да Нгурах-Рай халқаро аэропортига (Ngurah Rai International Airport), шунингдек Денпасар халқаро аэропорти (Denpasar International Airport) сифатида ҳам танилган аэропортга қўнди.
“Ўзбекистон учун бу нафақат янги рейснинг йўлга қўйилиши – бу очиқлик, глобал туризмга интилиш ва халқаро алоқаларни мустаҳкамлаш рамзидир. Биз Тошкентни Бали билан тўғридан-тўғри боғлаган биринчи бўлганимиздан фахрланамиз”, — дея таъкидлади Qanot Sharq кема капитани Дмитрий Ефремов.
Йўналишнинг очилиши Жануби-Шарқий Осиёга бўлган ўсиб бораётган қизиқишга жавоб ва мамлакат ичидаги туристик талабнинг етилганлигини тасдиқлаш бўлди. Бали Ўзбекистонлик туристлар учун энг кўп орзу қилинадиган йўналишлардан бири бўлиб, энди у ҳар қачонгидан ҳам яқинроқ бўлди.
“Балига тўғридан-тўғри рейс – бу Ўзбекистоннинг янги амбициялари аксидир. Туризм ўзгармоқда, мамлакат дунёга очиқ, фуқаролари эса тобора узоқ, таассуротларга бой маршрутларни танламоқда. Биз бу ўзгаришнинг йўлбошчиси бўлганимиздан хурсандмиз”, — дея маълум қилди Asialuxe Travel.
Тошкент-Бали йўналиши бўйича тўғридан-тўғри рейслар ҳар 10 кунда 3 сентябрга қадар амалга оширилади.
Жадвал: 5, 15, 25 июль, 4, 14, 24 август, 3 сентябрь.
