Президент Администрациясида яна иккита янги тайинлов амалга оширилди, деб хабар берди давлат раҳбарининг матбуот котиби Шерзод Асадов.
Бекзод Мардонович Мавлонов Ўзбекистон Республикаси Президентининг фармони билан Ўзбекистон Республикаси Президенти ёрдамчиси лавозимига тайинланди. Шу муносабат билан у Президентнинг ҳуқуқий экспертиза ва комплекс таҳлил масалалари бўйича маслаҳатчиси лавозимидан озод этилди.
Аввалги йилларда у Президент Администрациясининг Ҳуқуқий экспертиза ва комплекс таҳлил департаментини бошқарган, Президентнинг давлат маслаҳатчиси ўринбосари ва Бош прокурор ўринбосари лавозимларида ишлаган.
Азиз Юлдашевич Магрупов Президентнинг ташқи инвестициялар масалалари бўйича маслаҳатчиси лавозимига тайинланди. Шу муносабат билан у 2018 йилдан буён ишлаб келган Ўзбекистон Республикаси Президенти ёрдамчиси лавозимидан озод этилди.
Аввалроқ Президент ёрдамчиси лавозимида ишлаган Саида Мирзиёеванинг Президент Администрацияси раҳбарининг янги таъсис этилган лавозимига тайинлангани хабар қилинганди.
