2025 йилнинг дастлабки беш ойида Ўзбекистонда йўл-патруль хизмати ходимларига 64 та пора бериш ҳолати қайд этилган. Қонунбузарларга нисбатан жиноий ишлар қўзғатилган. Бу ҳақда 2025 йил 13 июнь куни Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг матбуот анжуманида маълум қилинди.
Тадбирда «Газета» мухбири ДПС инспекторлари қачон асосан «қўл меҳнати»дан (яъни, улар бир жойда туриб, машиналарни тўхтатиб, узоқ вақт жарима ёзаётган бир пайтда атрофда ўнлаб бошқа қоидабузарликлар содир этилади) кенг патруллик ва жараённи максимал даражада автоматлаштиришга ўтиши ҳақида савол берди. Бундай режалар кўп йиллар олдин айтилган эди.
ЙҲХХ бошлиғи Шерзод Ибрагимов буни келажакда амалга ошириш режалаштирилганини таъкидлади.
«Ҳайдовчи ва Йўл ҳаракати хавфсизлиги хизмати ходими ўртасидаги ўзаро муносабатларда инсон омилини максимал даражада қисқартириш асосий мақсадларимиздан биридир. Бу йўналишда кенг кўламли ишлар олиб борилмоқда»,— деди у.
«Келажакда, албатта, бу масалани кўриб чиқиш режамиз бор. Бироқ, баъзи ҳолларда жазонинг муқаррарлигини таъминлаш учун ДПС ходими керак. У давлатнинг муайян функциясини бажаради»,— деди хизмат раҳбари.
«Вақти келиб, барча техникамиз талабларга жавоб берганда, бизда [инсон омилини] чеклаш имконияти бўлади»,— деди Шерзод Ибрагимов.
