Пентагон Лос-Анжелесга 700 нафар денгиз пиёдасини юборди, у ерда бир неча кундан бери иммиграция рейдларига қарши норозилик намойишлари давом этмоқда, дея хабар берди New York Times. АҚШ президенти Дональд Трамп ҳам шаҳарга яна 2000 нафар Миллий гвардия жангчисини жойлаштиришга фармон берди.
АҚШ Мудофаа вазири Пит Ҳегсет 700 нафар денгиз пиёдасини юборишга асос сифатида “федерал ҳуқуқни муҳофаза қилиш органлари ходимлари ва федерал биноларга нисбатан таҳдидларнинг кучайганини” келтирди. “Биз ҳуқуқни муҳофаза қилиш органлари ходимларини ҳимоя қилишга мажбурмиз — [Калифорния губернатори] Гевин Ньюсом буни қилмаса ҳам”, — деб ёзди Ҳегсет X ижтимоий тармоғида.
Reuters таъкидлашича, денгиз пиёдаларини жойлаштириш ҳарбий кучнинг фавқулодда қўлланилиши ҳисобланади ва бу ҳудудий ҳамда маҳаллий ҳокимият органларининг ёрдам сўрамаган эътирозларига қарамай содир бўлмоқда.
Қўшимча Миллий гвардия қўшинлари аллақачон юборилган 2000 нафар жангчига қўшилади. Пентагонда бу қарорни “президентнинг буйруғи” билан изоҳлашди.
“Президент буйруғига биноан Мудофаа вазирлиги яна 2000 нафар калифорниялик миллий гвардиячиларни сафарбар қилади, улар ICE [Иммиграция ва божхона полицияси]ни қўллаб-қувватлаш учун федерал хизматга чақирилади, токи федерал ҳуқуқни муҳофаза қилиш органлари ўз вазифаларини хавфсиз бажара олсинлар”, — деди Пентагон матбуот котиби Шон Парнелл.
Лос-Анжелесда жами 4700 нафар ҳарбий хизматчи бўлади.
Калифорния губернатори Гевин Ньюсом миллий гвардиячилар ва денгиз пиёдаларининг юборилишини танқид қилди. Унинг сўзларига кўра, юборилган дастлабки 2000 нафар Миллий гвардия жангчисидан фақат 300 нафар ҳарбий хизматчи жалб қилинган, қолганлари эса федерал биноларда “овқатсиз ва сувсиз” ўтирибди.
“Бу жамоат хавфсизлиги масаласи эмас. Бу президентнинг хавфли эгосига берилишдир. Бу эътиборсизлик. Бемаънилик ва қўшинларимизга нисбатан ҳурматсизлик”, — деб ёзди Ньюсом X да.
Ньюсом, шунингдек, Калифорния штати Трамп маъмуриятини Миллий гвардия қўшинларини жойлаштириш қарори юзасидан судга берганини эълон қилди. “Президент Трамп қонуний ижро ҳокимияти чегараларидан ошиш учун бир неча бор фавқулодда чораларга мурожаат қилган. Шанба, 2025 йил 7 июнь куни у маҳаллий ҳокимият органлари томонидан назорат қилинган норозилик акциясидан яна бир мисли кўрилмаган ҳокимиятни эгаллаш учун фойдаланди, бу сафар Калифорния штати суверенитети ҳисобидан ва губернаторнинг штат Миллий гвардияси бош қўмондони сифатидаги обрўси ва ролига зид равишда”, — дейилади шикоятда.
Лос-Анжелесда иммиграция сиёсатига қарши оммавий норозилик намойишлари 2025 йил 6 июндан бери давом этмоқда. Улар иммиграция рейдларига жавобан бошланган ва намойишчилар ҳамда ҳуқуқни муҳофаза қилиш органлари ўртасидаги тўқнашувларга айланган. 7 июнь куни Трамп митингларни тарқатиш учун Миллий гвардия жангчиларини жалб қилишга фармон берди. Ньюсом бу қадамни “қасддан фитначилик” деб атади.
