2026 йилги футбол бўйича жаҳон чемпионати саралаш босқичининг учинчи босқичи доирасидаги ўйинга мухлис сифатида «Тошкент-Шаржа» рейси билан БААга етиб келган 100 дан ортиқ Ўзбекистон фуқароси 2025 йил 2 июнь куни эрталаб Шаржа аэропортида ушлаб турилди. Бу ҳақда рейс йўловчилари орасида бўлган «Газета.uz» мухбири хабар берди. БАА ва Ўзбекистон терма жамоалари ўртасидаги ўйин 5 июнь куни Абу-Дабида бўлиб ўтади.
«Дастлаб улар аёллар ва кексаларни ўтказиб юборишди. Мамлакатга биринчи марта келган қолган эркаклар ва йигитлардан сўровнома тўлдириш, меҳмонхона брони тасдиқномасини ва қайтиш чипталари нусхаларини тақдим этишни сўрашди. Ҳамма ҳужжатларни топширгач, улардан нусха олинди, кейин ҳужжатларни ичкарига олиб кириб, қайтиб чиқишмади. Биз Шаржа вақти билан соат 6:05 да қўндик, ҳозир эса 11:05. Ҳеч нарса дейишмаяпти. Нега, қачон ва қандай жавоб бўлиши ҳақида ҳеч қандай маълумот йўқ», — деди мухбир суҳбат чоғида.
Соат 13:10 да у йўловчиларни қўйиб юбора бошлашганини хабар қилди. Соат 15:00 дан сўнг ушлаб турилганларнинг охирги гуруҳи аэропортдан чиқиб кетди. Айни шу куни Тошкентдан Шаржага яна бир рейс келиши керак эди. Унинг йўловчиларини ҳам худди шундай текширувлар кутган бўлиши мумкин.
2025 йил 1 июнь куни ўзбекистонлик журналистлар ҳам аэропортда тахминан 8 соат ушлаб турилган эди, деб ёзди журналист Нодирхўжа Йўлдошев. «Охирги пайтларда Абу-Даби ва Шаржага рейслар билан доимий муаммолар бор. Асосан 25 ёшдан 35 ёшгача бўлган сайёҳларни ушлаб қолишмоқда. Оиласи билан бўлганларни ва кексаларни тегмайдилар. Менинг маслаҳатим: ўйин куни Шаржа ва Абу-Даби орқали учманг, улгурмаслигингиз мумкин. Дубайдан — муаммо йўқ», — дея таъкидлади у.
2025 йил 2 июнь куни тадбиркор Бектош Ҳотамов ўзининг Telegram-каналида Тошкент Туризм бошқармаси томонидан пойтахтда фаолият юритаётган соҳа тадбиркорларига юборилган хатни эълон қилди. Унда айтилишича, 29 апрель куни Туризм қўмитасига Ташқи ишлар вазирлигининг Консуллик-ҳуқуқий департаментидан мурожаат келиб тушган. Мурожаатда йирик спорт блогерлари миллий терма жамоа фан-клуби аъзолари билан биргаликда Ўзбекистон-БАА ўйинига 5000 нафар Ўзбекистон фуқаросини томошабин сифатида Бирлашган Араб Амирликларига жалб қилиш учун ижтимоий тармоқларда кенг кўламли кампания олиб бораётгани айтилган.
Ўйин БАА жамоасининг 12 минг томошабинга мўлжалланган «Ал-Ваҳда» уй стадионида бўлиб ўтади. Осиё футбол конфедерацияси қоидаларига кўра, қабул қилувчи томон меҳмон жамоа томошабинлари учун стадион сиғимининг 8%ини (960 киши) ажратиши шарт. Консуллик-ҳуқуқий департаменти мурожаатида мухлисларнинг стадионга жойлаша олмаслиги эҳтимоли юқори эканлиги, бу эса хавфсизлик билан боғлиқ муаммоларга олиб келиши мумкинлиги айтилган.
Туризм бошқармаси турфирмаларга БАА аэропортларидаги хавфсизлик органлари Ўзбекистон фуқароларини ортга қайтариши мумкинлиги ҳақидаги тахминларни инобатга олиб, бу кунларда БААга турпакетлар бўйича сайёҳларни юбормасликни тавсия қилди.
Ўзбекистон ТИВ изоҳи
Ўзбекистон Ташқи ишлар вазирлиги матбуот котиби Ахрор Бурхонов вазирлик БАА аэропортларида Ўзбекистон фуқароларини кўп соатли текширувдан ўтказиш билан боғлиқ вазиятни алоҳида назорат қилиб бораётганини маълум қилди.
«Айни пайтда фуқароларимизнинг қонуний ҳуқуқ ва манфаатларини ҳимоя қилиш учун барча чоралар кўрилмоқда. Мамлакатимизнинг Абу-Дабидаги элчихонаси ва Дубайдаги бош консуллиги БААнинг тегишли тузилмалари билан шошилинч музокаралар ўтказди ва вазиятни яхшилаш учун улар билан доимий алоқада бўлмоқда», — дейилади баёнотда.
«БАА маълумотига кўра, аэропортларда узоқ давом этган текширувлар мамлакатда турли халқаро тадбирлар ўтказилиши муносабати билан хавфсизлик чоралари кучайтирилгани билан боғлиқ. Ҳозирда фуқароларимизни текширувдан тезлаштирилган тартибда ўтказиш учун барча имкониятлар ишга солинган, натижада улар аллақачон мамлакат ҳудудига кира бошлашди», — деди Ахрор Бурхонов.
Ўзбекистон фуқароларининг БААга киришидаги муаммолар
2024 йил ноябрь ойи охиридан бошлаб Абу-Даби аэропортида Тошкентдан учиб келган ўнлаб эркак — Ўзбекистон фуқаролари ушлаб турилган эди. Уларнинг паспортлари олиб қўйилган, БААга киришлари тақиқланган ва аэропортдан чиқарилмаган. Бир суткадан кўпроқ вақт ўтгач, чипталарни ўзлари сотиб олишга муваффақ бўлган эркакларнинг бир қисми Ватанга қайтган. Бу ҳолат БААда исроиллик раввин Цви Коганнинг ўлдирилишидан кейин содир бўлган бўлиб, унда уч нафар Ўзбекистон фуқароси айбланган эди. Ўшандан бери, хабарларга кўра, Ўзбекистонлик эркаклар Абу-Дабига келганларида кучайтирилган текширувларга ва мамлакатдан чиқариб юборишга дучор бўлмоқдалар.
2025 йилнинг апрель ойида Дубайда кўча тўқнашувида иштирок этганликда гумонланиб 15 нафар Ўзбекистон фуқароси ҳибсга олинган эди. БАА расмийлари ўзбекистонликлар томонидан «қонунбузарлик ҳолатлари сонининг кўпайиши» туфайли визасиз режим шартларини қайта кўриб чиқиши мумкинлигини билдирди. Ўзбекистон ТИВ ватандошларни қонунбузарликлардан тийилишга чақирди.
