2025 йил 28 май куни оқшомида ижтимоий тармоқларда гўёки юқори тезликда ҳаракатланувчи «Afrosiyob» электропоездида ёнғин акс этган видео пайдо бўлди.
«Ўзбекистон темир йўллари» компаниясининг маълум қилишича, «ёнғин фақатгина составни ташиш бўйича ёрдамчи операцияларни бажарувчи маневр тепловозини қамраб олган».
«Afrosiyob поездининг состави ёнғиндан зарар кўрмаган ва эртага рейсни амалга оширади. Ёнаётган вагонда йўловчилар борлиги ҳақидаги даъволар ҳақиқатга мос келмайди. Ҳодиса мунтазам рейсдан ташқарида содир бўлган ва ўша пайтда поезд йўловчи ташимаган», — дея хабар берди компания.
«Тезкор ўрганиш жараёнида маълум бўлишича, „Тошкент-Йўловчи“ станциясида ТЭМ2 №2711 серияли тепловознинг маневр ишларини бажариш вақтида тепловознинг чиқариш коллекторида дизель ёнилғиси ёниш маҳсулотлари — куйинди, қатрон ва қумларнинг юқори ҳароратли тутун газлари билан алоқаси натижасида чақнаш содир бўлган. Локомотив бригадасининг ёнилғи етказиб беришни ўчириш ва двигателни совутиш бўйича ҳаракатлари туфайли чақнаш бартараф этилган», — дейилади компаниянинг кейинги хабарида.
Тепловоз иш ҳолатида ва маневр ишларини давом эттирмоқда.
«Ўзбекистон темир йўллари»нинг қайд этишича, юқори тезликда ҳаракатланувчи «Afrosiyob» электропоездининг барча рейслари жадвалда ўзгаришларсиз амалга оширилади.
