АҚШ Давлат департаменти дунё бўйлаб Америка элчихоналари ва консулликларига F, M ва J тоифасидаги талаба визаларини олиш учун янги суҳбатларни вақтинча белгиламаслик бўйича кўрсатма юборди. Бу ҳақда CNN, Politico ва бошқа бир қатор Америка оммавий ахборот воситалари хабар бермоқда. Нашрлар 2025 йил 27 май куни АҚШ Давлат котиби Марко Рубио имзолаган дипломатик телеграммага таянмоқда.
Бу чора президент Дональд Трамп маъмуриятининг аризачиларнинг ижтимоий тармоқлардаги аккаунтларини текширишни кенгайтириш режалари билан боғлиқ ҳолда жорий этилмоқда. Аввалдан режалаштирилган суҳбатлар тақиқ остига тушмаган.
«Шу пайтдан бошлаб, мажбурий текширувни ва ижтимоий тармоқлардаги текширувни кенгайтиришга тайёргарлик доирасида консуллик бўлимлари талаба ёки алмашинув визалари (F, M ва J) учун қабул қилиш жойлари сонини, яқин кунларда чиқишини кутаётган алоҳида кўрсатмалар берилмагунча оширмаслиги керак», — дейилади ҳужжатда.
Давлат департаменти Рубионинг кўрсатмасини тасдиқлади ва «визага номзодларни танлаш ва текширишда барча мавжуд маълумотлардан фойдаланишини» билдирди. Давлат департаменти вакилининг аниқлик киритишича, 2019 йилдан бери визага ариза берувчилардан иммиграцион ва ноиммиграцион виза ариза шаклларида ижтимоий тармоқ идентификаторларини кўрсатиш талаб этилади.
Телеграммада потенциал талабаларнинг ижтимоий тармоқлари қандай мезонлар бўйича баҳоланиши очиб берилмаган, бироқ ҳужжатда терроризм ва антисемитизмга қарши курашишга қаратилган фармонлар тилга олинган.
Аризачиларнинг ижтимоий тармоқлардаги аккаунтларини кенгайтирилган текширув нималарга олиб келиши номаълум, аммо бу талаба визаларини беришнинг умумий жараёнини жиддий секинлаштириши мумкин, деб қайд этади CNN. Бундай чора хорижий талабаларни АҚШ университетларида ўқишдан ҳам қайтариши мумкин, уларнинг кўпчилиги молиявий жиҳатдан уларга боғлиқ. Айрим олий ўқув юртларида хорижий талабалар муайян фанлар бўйича, асосан табиий фанлар соҳасида кўпчиликни ташкил этади, деб ёзади New York Times.
«Айниқса ҳозир талабалар август ойида ўқишни бошлаш учун визага ариза топширадиган вақт. Вақт тасодифий эмас. Бу кузда хорижий талабаларнинг қабулига жиддий зарар етказиш ва бу талабаларга таянган кўплаб университетларга зарар етказиш мақсадида қилинган», — деди CNN’га берган интервьюсида Америка Иммиграция Адвокатлари Ассоциациясининг собиқ президенти Чарльз Кук.
Давлат департаментининг янги кўрсатмаси АҚШ расмийларининг Фаластиндаги вазият билан боғлиқ норозилик намойишларида қатнашган талабаларнинг визаларини оммавий равишда қайтариб олиш ва Гарвард университетига хорижий талабаларни қабул қилишни тақиқлаш фонида чиқди.
Халқаро таълим институти (Institute of International Education, IIE) ҳисоботига кўра, 2023-2024 ўқув йилида АҚШ олий ўқув юртларида 1,1 миллиондан ортиқ хорижий талаба таҳсил олган. Ўзбекистонлик талабалар сони 1219 кишини ташкил этган.
