Россия фуқаролигини олган Марказий Осиё давлатларидан бўлган 20 минг нафар мигрант Украинага қарши урушда қатнашмоқда. Бу ҳақда РФ Тергов қўмитаси раҳбари Александр Бастрикин Петербург халқаро юридик форумида (ПМЮФ) маълум қилди.
«Бизнинг ҳарбий тергов бошқармамизга мигрантлар жойлашган жойларда доимий рейдлар ўтказиш ваколати берилган. Биз Россия Федерацияси фуқаролигини олган, лекин ҳарбий ҳисобга турмаган чет элликларни — улар буни қилишга мажбур бўлсалар ҳам — ушлаяпмиз. Биз аллақачон 80 минг шундай Россия фуқаросини ушладик, улар фронтга бориш тугул, ҳарбий комиссариатга ҳам боришни хоҳламайди. 80 минг кишини ушлаб, ҳарбий ҳисобга қўйдик ва аллақачон 20 минг нафар „ёш“ Россия фуқароси, негадир Ўзбекистон, Тожикистон, Қирғизистонда яшашни ёқтирмайдиганлар, фронтда турибди», — деди Бастрикин 2025 йил 19 май куни миграция ҳуқуқий тартибга солинишига бағишланган сессияда сўзга чиқиб.
«Медиазона» нашрининг қайд этишича, Украинадаги уруш бошланганидан кейин Россия Федерацияси ҳуқуқни муҳофаза қилиш органлари Россия фуқаролигига эга мигрантларни қидириб, мунтазам равишда рейдлар уюштирмоқда, уларга чақирув қоғозлари топширилмоқда ёки ҳарбий комиссариатларга олиб кетилмоқда. Баъзида Россия фуқаролигини олган шахсларга мамлакатдан чиқариб юбориш билан таҳдид қилиниб, ҳарбий шартномалар имзолашга мажбурланмоқда.
2023 йил октябрида РФ Тергов қўмитаси раҳбари Россия паспортини олган мигрантларни Украинага қарши урушда иштирок этишга жалб қилишни, агар рад этишса, уларни фуқароликдан маҳрум қилишни таклиф қилган эди.
2024 йил июнида Бастрикин Россияда яқинда Россия паспортини олган 30 мингдан ортиқ киши «ушлангани» ва улар ҳарбий ҳисобга қўйилганини айтган эди. Унинг сўзларига кўра, улардан қарийб 10 минг нафари «ҳарбий махсус операция» зонасига «хандақ қазиш ва мустаҳкамлаш ишларини олиб бориш» учун юборилган.
2024 йил июлида РФ Давлат Думаси чет элликларни Россия паспортини олиш билан бир вақтда ҳарбий ҳисобга туришга мажбурловчи қонунни қабул қилган, акс ҳолда улар фуқароликдан маҳрум этилиши мумкин. Август ойида бу қонунни Россия президенти Владимир Путин имзолаган.
2025 йил апрелида Россия ҳарбийларига ихтиёрий равишда таслим бўлишда ёрдам бериш учун яратилган Украинанинг «Хочу жить» давлат лойиҳаси Россия Федерацияси Қуролли Кучлари билан шартнома тузган ва Украинага қарши жанговар ҳаракатларда иштирок этган 1110 нафар Ўзбекистон фуқаросининг рўйхатини эълон қилди. Лойиҳада таъкидланишича, Россия фуқаролигига эга Ўзбекистонликларни ҳисобга олганда, урушга жалб қилинган ўзбекистонликларнинг умумий сони бир неча мингга етиши мумкин. Ўзбекистон ТИВ кейинроқ мамлакатнинг ваколатли органлари бу маълумотни текширишни бошлаганини хабар қилган эди.
