Тошкентни ривожлантириш жамғармасидан йўл ҳаракати хавфсизлигини таъминлаш тадбирларига 2 миллиард сўмдан ортиқ маблағ ажратилади. Бу ҳақдаги қарорни 2025 йил 20 май куни пойтахт ҳокими имзолади.
Жумладан, вояга етмаганларнинг транспорт уришининг олдини олиш мақсадида шаҳарда 42 та баландлаштирилган пиёдалар ўтиш жойини жиҳозлаш учун 588 миллион сўм йўналтирилади.
Баландлаштирилган ўтиш жойлари сони:
- Мирзо Улуғбек тумани — 2 та;
- Яшнобод тумани — 3 та;
- Бектемир тумани — 4 та;
- Олмазор тумани — 6 та;
- Шайхонтоҳур тумани — 5 та;
- Юнусобод тумани — 5 та;
- Чилонзор тумани — 3 та;
- Сергели тумани — 5 та;
- Миробод тумани — 5 та;
- Яккасарой тумани — 2 та;
- Янгиҳаёт тумани — 2 та.
Яна қарийб 1,5 миллиард сўм кўчалар бўйлаб 5600 м металл тўсиқлар ўрнатишга йўналтирилади – «пиёдалар иштирокидаги ЙТҲларнинг олдини олиш мақсадида»:
- Олмазор тумани — 1 000 м;
- Шайхонтоҳур тумани — 600 м;
- Бектемир тумани — 400 м;
- Яшнобод тумани — 300 м;
- Чилонзор тумани — 700 м;
- Учтепа тумани — 600 м;
- Яккасарой тумани — 850 м;
- Сергели тумани — 250 м;
- Юнусобод тумани — 400 м;
- Мирзо Улуғбек тумани — 500 м.
Ишлар Тошкентни ривожлантириш жамғармаси маблағлари ҳисобидан молиялаштирилади, уларни туман ободонлаштириш бошқармалари амалга оширади.
Эслатиб ўтамиз, Болалар омбудсмани офиси ва Миллий гвардия томонидан 2024 йилда ўтказилган тадқиқот натижаларига кўра, мамлакатдаги мактабларнинг 25% и (жами мактаблар сони — 10 145 та) автомобиль йўллари яқинида жойлашган бўлиб, бу болалар иштирокидаги ЙТҲлар эҳтимолини ошириши аниқланган.
Болалар омбудсмани Сурайё Раҳмонова март ойида ҳукуматга масъул раҳбарлар болаларни йўл-транспорт ҳодисаларидан ҳимоя қилиш учун мактаблар ва болалар боғчалари олдида қулай ва хавфсиз шароитлар яратишга эътибор қаратишлари кераклиги ҳақида сўров киритган эди.
Натижада мактаблар ва болалар боғчалари олдидаги юқори хавфли жойларда баландлаштирилган пиёдалар ўтиш жойларини жиҳозлаш бошланди. Май ойи ўрталарига қадар бутун мамлакат бўйлаб мактаблар олдида 425 та светофор тўплами, 865 та баландлаштирилган пиёдалар ўтиш жойи, 1600 та жойда сунъий нотекисликлар ва 7600 та жойда тўсиқлар ўрнатилди.
Шу билан бирга, болалар омбудсмани йўлларда болалар хавфсизлигини таъминлаш чораларини ҳали ҳам етарли эмас деб ҳисоблайди, тротуарлар йўқлиги ва инфратузилманинг заифлиги билан боғлиқ муаммолар сақланиб қолмоқда.
Яқинда Тошкентда кўчаларнинг ўртасига яна тўсиқлар ўрнатиш бошланди — энди рангли тўрдан («еврозабор»). Шу билан бирга, улар вилоятларда ҳам пайдо бўлди. ЙҲХББ мақсад — кўчаларни рухсат этилмаган жойлардан кесиб ўтишнинг олдини олиш эканлигини билдирди. Урбанистлар эса пиёдаларни чеклаш эмас, балки улар учун шароит яратиш керак деб ҳисоблайдилар.